Затворањето за време на ковид пандемијата довело до две фасцинантни промени во телата на бебињата, покажало истражување. Научниците од Универзитетот во Корк во Ирска откриле дека децата родени за време на ковид затворањата имале променет цревен микробиом – екосистем на „добри“ и „лоши“ бактерии во цревата кои го помагаат варењето, ги уништуваат штетните бактерии и помагаат во контролата на имуниот систем. Утврдено е дека биомот е покорисен кај доенчињата родени за време на пандемијата.
Истражувачите веруваат дека ова довело до тоа да ковид-бебињата имаат помалку од очекуваните стапки на алергиски состојби, како што се алергии на храна, во споредба со бебињата родени пред пандемијата. Исто така, ним им биле потребни помалку антибиотици за лекување на болестите.
Истражувачите анализирале примероци од столицата од 351 ирски бебиња родени во првите три месеци од пандемијата, помеѓу март и мај 2020 година, и ги споредиле со примероци од бебиња родени пред пандемијата. Примероците се собирани на возраст од шест, 12 и 24 месеци, а тестирање за алергија е направено на возраст од 12 и 24 месеци.
Утврдено е дека новороденчињата родени за време на пандемијата имаат повеќе корисни микроби добиени од мајката по раѓањето кои би можеле да дејствуваат како одбрана од алергиски болести. Бебињата родени за време на пандемијата имале помали стапки на алергии: околу пет проценти од бебињата развиле алергија на храна до една година, во споредба со 22,8 проценти од бебињата родени пред ковидот.
Ковид-бебињата се и подолго доени
Истражувачите велат дека мајките им пренесувале корисни микроби на своите бебиња додека биле бремени, а тие добивале дополнителни микроби од околината по раѓањето.
Студијата исто така открила дека бебињата родени за време на карантините имале помалку инфекции бидејќи не биле изложени на бактерии. Ова значи дека им требале помалку антибиотици. Исто така, бебињата родени за време на затворањата биле доени подолго време, што давало дополнителни придобивки.
Од ковид-бебињата, само на 17 проценти од доенчињата им требало антибиотик до првата година од животот. Пред пандемијата, 80 отсто од бебињата земале антибиотици до навршени 12 месеци.
Истражувачите се надеваат дека повторно ќе ги испитаат децата кога ќе наполнат пет години за да видат дали постојат долгорочни ефекти од раните промени во цревниот микробиом. Студијата е објавена во списанието Allergy.
