Вакцините против КОВИД-19 го преполовиле бројот на починати од КОВИД-19 во Италија, спречувајќи околу 150.000 смртни случаи и 8 милиони инфекции минатата година, процени Националниот институт за здравство на Италија.
Студијата на институтот, која почнала во 2021 година, а траела до крајот на јануари 2022 година, укажува на тоа дека кампањата за вакцинација истовремено спречила повеќе од 500.000 хоспитализации и повеќе од 55.000 приеми на одделите за интензивна нега.
Од почетокот на епидемијата во февруари 2020., во Италија се регистрирани 161.032 смртни случаи поврзани со КОВИД-19, што е втор најголем број на жртви во Европа по Велика Британија и осми во светот. До денес во оваа земја се пријавени 15,4 милиони случаи на зарази со коронавирус.
Околу 79 проценти од Италијанците се комплетно вакцинирани, а 65 отсто примиле и трета или бустер доза вакцина. Студијата на Институтот проценува дека 72 отсто од оние на кои вакцините им спасиле живот имале над 80 години, 19% биле на возраст помеѓу 70 и 79 години, 7% на возраст од 60 до 69 години и 3% имале помалку од 60 години.
До резултатите, Институтот дошол со пресметка во која се користени податоци за ефикасноста на вакцините и за бројот на вакцинирани на неделно ниво.
Целта на студијата е да се процени влијанието на вакцината врз неделниот број на случаи на инфекции, бројот на хоспитализирани, бројот на пациенти примени на одделите за интензивна нега и на бројот на смртни случаи.
