Ризикот од епидемија на мали сипаници (морбили) е висок откако повеќе од 22 милиони бебиња ја пропуштиле првата доза од вакцината за време на пандемијата на коронавирус, предупредија од Светската здравствена организација (СЗО) и Американскиот центар за контрола и превенција на болести (ЦДЦ).
Пријавените случаи на мали сипаници паднаа за повеќе од 80 отсто минатата година во споредба со 2019 година, но поголемиот број деца кои ја пропуштаат вакцината ги прави ранливи, се вели во заедничкиот извештај на СЗО и ЦДЦ.
- Околу три милиони повеќе деца ја пропуштиле вакцинација во 2020 година во споредба со 2019 година, што е најголем пораст во последните две децении, заканувајќи се на глобалните напори за евентуално искоренување на високозаразната вирусна болест
Малите сипаници се една од најзаразните познати болести, повеќе од коронавирусот, еболата, туберкулозата или грипот. Ова може да биде особено опасно за бебињата и малите деца, а меѓу можните компликации е пневмонијата.
Во 2019 година, пријавените случаи на сипаници беа најголеми во речиси четврт век.
„Рутинската имунизација мора да се заштити и зајакне, во спротивно ризикуваме да замениме една смртоносна болест за друга“, рече д-р Кејт О’Брајан, директор на Одделот за имунизација на СЗО.
