Светската недела на доење (WBW) е глобална кампања за подигање на свеста и преземање акција на теми поврзани со доењето. Светската недела на доење започна со одбележување во 1992 година, со годишни теми, вклучувајќи ги и здравствените системи, изработка на меѓународен кодекс за маркетинг за адаптирано млеко, поддршка од заедницата, екологија, економија, наука и образование како и човекови права. Од 2016 година Светската недела на доење е усогласена со Целите за одржлив развој (SDG). Во 2018 година резолуцијата на Светското здравствено собрание ја одобри Светската недела на доење како важна стратегија за промовирање на доењето. Овогодинешното мото на светската недела за доење е: „Направете чекор напред – едуцирајте и поддржете го доењето“.
Само 41% од од доенчињата на возраст под 6 месеци се ексклузивно на мајчино млеко
Светската недела на доење ќе се фокусира на зајакнување на капацитетот на актерите кои треба да го заштитат, промовираат и поддржат на различни нивоа на општеството. Овие актери го сочинуваат топлиот синџир за поддршка на доењето. Целната публика, вклучително и владите, здравствените системи, вработените во институциите, заедниците, ќе бидат информирани, едуцирани и овластени да го зајакнат својот капацитет за обезбедување и одржување средини погодни за доењето за семејствата по постпандемскиот свет. Доењето игра важна улога во управувањето со двојното оптоварување на неухранетоста. Доењето е клучно за стратегиите за одржлив развој по пандемијата, бидејќи ја подобрува исхраната, обезбедува безбедност на храната и ги намалува нееднаквостите меѓу и во земјите. Овогодинешната тема е усогласена со тематската област 1 од кампањата WBW – SDG 2030 која ги истакнува врските помеѓу доењето и добрата исхрана, безбедноста на храната и намалувањето на нееднаквостите.
МАЈЧИНОТО МЛЕКО Е ИДЕАЛНА ХРАНА ЗА ДОЕНЧИЊАТА
Мајчиното млеко е идеална храна за доенчињата. Безбедено е, чисто и содржи антитела кои помагаат во заштитата од многу чести детски болести. Мајчиното млеко ја обезбедува целата енергија и хранливи материи што му се потребни на доенчето за првите месеци од животот и продолжува да обезбедува до половина или повеќе од нутритивните потреби на детето во текот на втората половина од првата година и до една третина во текот на втората година од животот. Несоодветните замени (адаптираната формула) продолжува да ги поткопува напорите за подобрување на стапката и времетраењето на доењето ширум светот.
ГЛОБАЛЕН СТАТУС ЗА ДОЕЊЕ
Оптималното доење е од витално значење за доживотното добро здравје и благосостојба на мајките и децата.
- Глобално три од пет бебиња не се дојат во првиот час од животот.
- Над 820 000 деца би можеле да се спасат годишно доколку сите деца од 0 до 23 месеци би биле оптимално доени.
- Само 41% од од доенчињата на возраст под 6 месеци се ексклузивно на мајчино млеко.
Мајчиното млеко ја обезбедува целата енергија и хранливи материи што му се потребни на доенчето за првите месеци од животот и продолжува да обезбедува до половина или повеќе од нутритивните потреби на детето во текот на втората половина од првата година и до една третина во текот на втората година од животот
СЗО и УНИЦЕФ препорачуваат:
- Рано започнување со доење во рок од 1 час од раѓањето.
- Ексклузивно доење во првите 6 месеци од животот.
- Континуирано доење до 2-годишна возраст или повеќе, со воведување на нутритивно соодветна и безбедна дополнителна цврста храна на 6-месечна возраст.
Светската здравствена организација активно го промовира доењето како најдобар извор на исхрана на доенчињата и малите деца и работи на зголемување на стапката на ексклузивно доење во првите 6 месеци до најмалку 50 % до 2025 година. СЗО и УНИЦЕФ го создадоа „Глобалниот колектив за доење“ за да соберат политичка, правна, финансиска и јавна поддршка за доењето. Колективот обединува спроведувачи и донатори од влади, филантропи, меѓународни организации и граѓанско општество. СЗО исто така обезбедува курсеви за обуки за здравствени работници за да обезбедат квалификувана поддршка на мајките што дојат, да им помогнат да ги надминат проблемите и да го следат растот на детето.
УНИЦЕФ во соработка со Институтот за јавно здравје на РСМ, Министерство за здравство, Министерство за труд и социјална политика, Министерство за образование и наука ја креираа новата мобилна апликација Bebbo наменета за поддршка на родителите. Апликацијата дава неопходна поддршка со практични совети за позитивно родителство. Во апликацијата може да се најдат и прочитаат корисни алатки и совети за растот и развојот на децата од 0-6 години како и корисни совети за доење и грижа за доенчињата. (Институт за јавно здравје на РСМ)
