За време на пандемијата со новиот коронавирус, многу мајки имаа многу дилеми, а една од нив и таа дали смеат да дојат доколку се заболени од КОВИД-19. Но, препораката на Светската здравствена организација е дека позитивните мајки треба да дојат за да го одржат контактот кожа на кожа, а дека треба со мерките како миење на рацете и носењето маска да ја намалат можноста за пренос на респираторните капки од вирусот на детето.
Доењето и КОВИД-19 повлекува уште многу прашања и подпрашања како тоа колку доењето влијае на ширењето на вирусот, како да се заштити и слично.
Препораката на СЗО е мајките кај кои постои сомнеж за инфекција со коронавирус или кај кои инфекцијата е веќе потврдена, да се охрабрат за започнат со доење или да го продолжат доењето. На мајките е потребно да им се советува дека предностите на доењето ги надминуват потенцијалните ризици за пренесување на вирусот.
На мајката и на бебето треба да им се овозможи заеднички престој во текот на целиот ден и ноќ за да остварат контакт кожа на кожа, особено веднаш по породувањето, како и за време на доењето, без оглед дали кај нив или кај нивните бебиња постои сомнеж за зараза или веќе потврдена инфекција со новиот коронавирус.
ХИГИЕНСКИ МЕРКИ КОИ СЕ ПРЕПОРАЧУВААТ НА МАЈКА КОЈА ДОИ, А КАЈ КОЈА Е ПОТВРДЕН КОВИД-19
- Често мијте ги рацете со сапун и вода и користете средство за дезинфекција на рацете на база на алкохол, пред контакт со детето
- Носете медицинска маска кога доите, сменете ја маската веднаш шттом стане влажна, искористената маска веднаш фрлете ја, не ставајте повторно исто маска, не го допирајте предниот дел на маската
- Користете средство за дезинфекција на рацете на база на алкохол или уште еднаш исмијте ги рацете со сапун и вода
- Редовно чистете ги и дезинфицирајте ги површините кои ги допирате
