Која телесна температура во раната бременост се смета за нормална? Треската кај идните мајки може да предизвика спонтан абортус, така што е важно да се знае кога и на кој начин е безбедно да се намали температурата.
Зошто се покачува телесната температура во раната бременост?
Телесна температура од 36,6 степени се смета за норма само формално. Всушност, нормални вредности кај здраво лице се сметаат оние помеѓу 35,2 и 37,2 степени. Во првото тромесечие од бременоста, температурата може да биде и повисока, и тоа поради зголеменото производство на прогестерон, хормон кој го помага носењето на фетусот. Нормална телесна температура во текот на раната бременост е до 37,4 степени.
Алармантен знак во бременоста е температура над 37,4 степени која трае неколку дена (три дена). Освен тоа, постојат и други знаци кои укажуваат дека итно треба да отидете на лекар:
- Болка во долниот дел од стомакот и во долниот дел на грбот
- Бледило на кожата
- Вагинално крварење
- Вртоглавица, слабост
- Течење од носот, кашлица, болка во грлото
- Болка при мокрење
- Често повраќање и болка во стомакот
- Пролив
- Осип, чешање
Температурата повисока од нормалната за време на бременоста е знак за вирусна инфекција, грип или некој воспалителен процес. Бидејќи имунитетот е послаб во бременоста, трудниците се поподложни на настинки, грип и други инфекции. Температурата за време на настинка често се зголемува на 38 до 40 степени.
Честа појава во бременоста е циститисот. При воспаление на мочниот меур температурата е покачена и се движи од 37,5 до 38 степени. Болката за време на мокрењето може да укажува на друга болест која е честа кај трудниците – воспаление на бубрезите, кога температурата може да се искачи на 39 до 40 степени.
Ако температурата е 38 степени и повеќе, на трудниците им се препорачува да земаат антипиретик. Но, за секое земање на било каков лек, треба да се консултираат со својот гинеколог за внимателно да ги следат препорачаните дози и временски интервали наведени во упатствата.
