Кога температурите се толку високи, лекарите советуваат дека е најдобро да не излегувате со бебето во периодот од 10 до 17 часот. Може да користите клима уред во домот, но внимавајте разликата помеѓу надворешната и внатрешната температура да не надминува 8 степени.И внимавајте студениот воздух од климата да не дува директно врз детето.
Еве неколку други совети кои ќе му помогнат на вашето бебе да ја преброди топлината што ќе трае следните неколку дена:
Памучните пелени се подобри за употреба во лето отколку синтетичките; како и во случајот со памучната облека, тие дозволуваат протоко на воздух и не ја затвораат детската кожа, па полесно ќе избегнете формирање на осип;
Тргнете ги дополнителните слоеви на облоги на количките или носилките бидејќи тие дополнително се загреваат на жештините; во лето особено е добро да ставите памучен чаршаф во количката или носилката;
Водете сметка дека на бебето му требаат повеќе течности во лето, исто како вас. Доколку исклучиво доите, на дете до шест месеци не му треба дополнителна течност, туку почесто и пократко доење. Ако не доите, одвреме-навреме давајте му на вашето дете зовриена и оладена вода;
Лосиони, масла, креми и пудра во комбинација со големите горештини лесно можат да предизвикаат осип и црвенило, затоа избегнувајте ги или намалете ја нивната употреба.
