Во јавноста деновиве одекна веста за 19-годишен студент од Масачусетс, кој бил хоспитализиран поради откажување на повеќе органи, а на крајот му биле ампутирани двете нозе и сите прсти, објави „The New England Journal of Medicine“.
На момчето му била дијагностицирана фулминантна менингококна сепса. Во извештајот се вели дека јадел остатоци од ориз и пилешко, по што почувствувал болки во стомакот и кожата му станала виолетова. Бил примен во болница поради „шок, откажување на повеќе органи и осип, а состојбата му се влошувала. Имал отежнато дишење, висок крвен притисок и повраќал. Инаку, претходно генерално бил во добра општа здравствена состојба, само повремено пушел и пиел алкохол“, пишува USA Today.
Состојбата е предизвикана од бактериска инфекција и предизвикува ненадејна треска и повраќање. Американскиот центар за превенција и контрола на болести предупредува дека може „да доведе до смрт за само неколку часа“.
Експертите велат дека овој исклучително редок случај се разликува од труење со храна предизвикано од бактерии како што е салмонела. Оваа шокантна приказна уште еднаш го привлече вниманието за безбедното складирање и повторно загревање на остатоците од храната.
Ако ви остане храна, изладете ја брзо, во рок од два часа, па чувајте ја во фрижидер или замрзнувач. Најдобро е да ја чувате храната во поплитки садови за што побрзо да се излади
Зошто остатоците од ориз може да бидат опасни?
„Постојат голем број на бактерии од кои може да се разболите преку храната. Тие можат да растат во храната која е предолго оставена на воздух, а можат да создадат и токсини во храната. Понекогаш дури и не се работи за тоа дека храната е расипана, туку контаминирана“, вели за USA Today д-р Френк Еспер од Центарот за педијатриски инфективни болести при детската болница во Кливленд.
Остатоците од ориз се посебно опасни бидејќи оваа храна ја содржи бактеријата Bacillus cereus. Кога се загреваат и се оставаат предолго, бактериите произведуваат токсини.
И тоа не е проблем само за оризот. Бактериите се поврзуваат и со сосови, супи и друга храна оставена на собна температура.
Нутриционистката од клиниката Мајо Кетрин Зерацки вели дека со правилното готвење се убиваат повеќето бактерии.
„Ако ви остане храна, изладете ја брзо, во рок од два часа, па чувајте ја во фрижидер или замрзнувач. Најдобро е да ја чувате храната во поплитки садови за што побрзо да се излади. А ако сакате подоцна да ја подгреете, се препорачува тоа да биде на температура до 73 степени Целзиусови за да биде безбедна за јадење и да се контролира оптоварувањето со бактерии“, рече таа.
Сета расиплива храна треба да се фрли ако е на воздух повеќе од два часа, а во текот на летните месеци, кога температурата на воздухот е повисока, тоа треба да се направи во рок од еден час од подготовката. Остатоците од храната можете да ги чувате во фрижидер три до четири дена.
