Сите многу зборуваат за имунитетот и неговото јакнење, особено во студениот период од годината, кога владеат респираторни вирусни инфекции, на кои децата се особено склони.
Децата, како и возрасните, имаат три типа на имунитет – вроден, стекнат и пасивен.
Вродениот (неспецифичен, природен) имунитет е имунитет со кој децата се раѓаат. Овој имунитет е општа заштита. Неговата улога е во тоа да ги препознава нападите на организмот и да може да пружи одбрана. Таков тип на имунитет, на пример, пружа кожата. Таа е заштитна бариера која спречува микробите да влезат во организмот.
Стекнатиот (специфичен) имунитет се развива за време на растењето. За да се стекне овој имунитет, детето мора да прележи различни болести. Друг начин на кој тој се стекнува е вакцинацијата.
Пасивниот имунитет детето го добива од некој друг извор и тој најчесто е привремен. На пример, бебињата кои се дојат го користат мајчиниот имунитет преку млекото што го внесуваат, па во тој период најчесто се заштитени од болести кои мајката веќе ги прележала.
