Кога кај бебе помладо од два месеца ќе се појави треска, сосема е природно и родителите и педијатрите да бидат загрижени. Иако повеќето случаи на треска не водат до сериозно заболување, честопати е тешко веднаш да се утврди причината за покачената температура кај бебето, а притоа да се избегнат непотребни испитувања или хоспитализација.
Секогаш јавете се кај педијатар ако бебето е помладо од два месеци и има треска
Американската академија за педијатрија (ААП) се осврнува на бројните прашања поврзани со проценка на инаку здрави доенчиња на возраст од 8 до 60 дена, кај кои се јавува треска од 38°C или повеќе, преку клиничка препорака. Насоката со наслов „Проценка и менаџмент на инаку здрави доенчиња со треска на возраст од 8 до 60 дена“ е објавена во списанието Pediatrics.
14 од секои 1 000 здрави, навремено родени доенчиња развиваат треска на возраст меѓу 8 и 60 дена. Повеќе од 10 % од доенчињата со треска имаат дијагностицирана инфекција на уринарниот тракт. Веројатноста за потешка, инвазивна бактериска инфекција е многу помала – помалку од 0,05 % од доенчињата развиваат менингитис, кој претставува најсериозната инфекција. Други можни инфекции кај малите бебиња се пневмонија, сепса и гастроентеритис
Треската – знак дека нешто не е во ред
„Бебињата на оваа возраст се премногу мали за да можат да опишат како се чувствуваат, па затоа треската е важен сигнал дека нешто не е во ред“, изјави д-р Бернард Драјер, член на ААП и еден од авторите на препораката, изработена од Поткомитетот за доенчиња со треска при Советот за квалитет и безбедност на пациентите на ААП.
„Како што дознаваме повеќе за ризиците и придобивките од третманот кај доенчињата, нудиме препораки засновани на докази кои лекарите можат да ги земат предвид. Исто така, ја признаваме значајната улога што ја имаат родителите во процесот на донесување одлуки, како информирани и активни учесници.“
Испитувањата и понекогаш хоспитализацијата се прават за да се исклучат ретки, но опасни инфекции
Според податоците на ААП, 14 од секои 1 000 здрави, навремено родени доенчиња развиваат треска на возраст меѓу 8 и 60 дена. Повеќе од 10 % од доенчињата со треска имаат дијагностицирана инфекција на уринарниот тракт. Веројатноста за потешка, инвазивна бактериска инфекција е многу помала – помалку од 0,05 % од доенчињата развиваат менингитис, кој претставува најсериозната инфекција. Други можни инфекции кај малите бебиња се пневмонија, сепса и гастроентеритис.
Препораката на ААП ги дели насоките според три возрасни групи: од 8 до 21 ден; од 22 до 28 дена; и од 29 до 60 дена. Новороденчињата во првата недела од животот (0-7 дена) имаат поинакви потреби и не се опфатени со овој извештај.
Повеќето случаи не се сериозни, но на оваа возраст е невозможно родителите сами да проценат
Препораката, која поминала низ детална анализа на докази нарачана од Агенцијата за истражување и квалитет во здравствената заштита (AHRQ), дава насоки за проценка и лекување, како и оценка на квалитетот на достапните докази врз кои се темелат препораките. Исто така, се опишани и ризиците и придобивките, вклучувајќи ги и оние поврзани со инвазивни процедури, како што се лумбална пункција или катетеризација на мочниот меур.
Секое новороденче со треска треба да биде прегледано од педијатар
„Секогаш кога толку мало бебе ќе развие треска, родителите треба да се јават кај својот педијатар за бебето да биде прегледано“, изјави д-р Шон О’Лири, член на AAP и коавтор на препораката. „Повеќето деца се добро, но некои имаат сериозни инфекции, а на оваа возраст е речиси невозможно родителот сам да процени дали станува збор за сериозна состојба или не.“
(Извор: Американската академија за педијатрија)
