Детето од мали треба да учи правилно и редовно да ги мие рацете оти така се намалува опасноста детето да заболи од бројни болести – грип, жолтица или цревни заразни болести и други инфекции.
Стручњаците велат дека детето треба да почне да ја усвојува оваа хигиенска навика уште кога ќе прооди (по навршување на една година), но многу често се случува децата и во втората, па дури и во третата година, се уште да не знаат правилно да ги измијат рацете.
На детето секојдневно треба да му се нагласуваат причините поради кои рачињата мора да бидат чисти и да се потсетува да ги измие пред јадење, пред и пи вршење на мала или голема нужда, по контакт со животни, игра во природа, кивање, дување нос или по подолго играње со играчки кои најчесто се расфрлани по под. Освен тоа, детето треба да се предупреди со валкани прстиња да не ги допира очите и носот.
- КАКО ПРАВИЛНО СЕ МИЈАТ РАЦЕ?
Рацете секогаш се мијат со топла вода со користење сапун. За многу мали деца попрактичен е течниот сапун. Рацете добро се насупунуваат, со особено внимание на кожата помеѓу прстите. Рацете се тријат и потоа убаво се одмиваат и се бришат.
МАЛИ ТРИКОВИ
Ако детето не сака да мие раце, без оглед на отпорот и плачењето, родителот е должен да го натера/убеди да ја прифати оваа хигиенска навика, но без тепање, закани или викање, оти ќе се создаде контраефект.
Најдобар начин миењето раце на детето да му стане интересно е да му предочите дека тоа всушност е нешто многу интересно. За почеток може да му направите мала претстава за миењето раце или заедно со него да цртате раце, вода и спаун и попат да му објаснувате колку е чистотата важна.
Претворете го миењето раце цо интересна игра: одберете интересни гумени или пластични играчки, па детето нека нив ги мие, односно нивните рачиња или шепи. А, потоа нека ги измие и своите. Може да смислите и своја песничка или стихови за миење на рацете.
