За време на бременоста од исклучително значење е да се осигура безбедно возење, особено ако вози бремената жена. Ова се најзначајни совети кои идните мајки би требало да ги почитуваат за времето зад волан да им биде помалку стресно.
СЕДЕЊЕ
Втората половина од бременоста, а особено последниот триместар бараат дополнително да го поместите седиштето наназад. Но, водете сметка папучите за гас, кумплунг и кочница да ви бидат нормално достапни. Идеално е воланот да биде оддалечен 25 сантиметри, а ако управувачот се подесува по висина, насочете ја средината на воланот подлаеку од стомакот и кон градите. Секако по промената на седиштето, не заборавајте да ги подесите и надворешните огледала.
ПОЈАС
При врзувањето отстранете ја сета гломазна облека од стомакот за да бидете сигурни дека појасот има правилна функција. Појасот ставете го преку рамената, помеѓу градите и од долната страна на стомакот, никако преку него. Траката на појасот треба секогаш да биде рамна, да не биде извиткана. Никогаш не го ставајте појасот зад себе или под рацете, оти во случај на несреќа тоа може да предизвика сериозни повреди.
ДОЛГО ВОЗЕЊЕ
Ако е можно, избегнувајте долго и напорно возење и правете чести паузи за да поттикнете циркулација во нозете. За време на бременоста стапалата и глуждовите може лесно да отечат при седење. Кога ќе правите пауза, истегнете се и размрдајте ги нозете и стапалата.
АКО НЕ ВОЗИТЕ…
За идните мајки најбезбедна позиција за седење во автомобил е на средина на задното седиште под услов да има сигурносен појас во три точки. Ако седите на сувозачко седиште турнете го што е можно повеќе наназад за да го заштитите стомакот во случај на активирање на воздушното перниче.
