Вагинално породување или царски рез – дилема која трае години наназад и за која многу често се зборува. Царскиот рез е операција која може да биде планирана или пак итна, доколку дојде до компликации.
Планираниот царски рез вообичаено се прави кога лекарот смета дека тоа е побезбедно, ако е бременост со повеќе бебиња, доколку бебето е многу големо, ако бебето не е свртено со главата надолу, ако претходно жената имала царски рез или доколку кај трудницата постојат состојби како висок крвен притисок, срцеви болести, дијабетес.
Итниот царски рез се прави тогаш кога породувањето не напредува нормално, доколку постои проблем со фетусот, плацентата, папочната врвца. Царскиот рез во вакви ситуации го спасува животот и на мајката и на бебето.
Многу жени сакаат да го споредуваат царскиот рез со вагиналното породување, па затоа ги издвојуваме основните разлики.
- ПРОЦЕДУРА
За време на вагиналното породување, мајката го чувствува самото раѓање, додека цервиксот се шири. Матката се контрахира и така ја придвижува главата на бебето кон вагиналниот отвор. Некои жени сакаат епидурална анестезија за да ја намалат болката, додека некои се повеќе за породување без никакви лекови. Многу веројатно е дека ќе може да го држите вашето бебе веднаш по раѓањето. Породувањето може да трае од 12 до 14 часа кога станува збор за жени кои прв пат раѓаат, а малку пократко ако веќе родиле.
Царски рез е операција која обично трае 45 минути од почеток до крај. Бебето се раѓа во првите петнаесет минути. Може да се изврши под тотална анестезија, или со епидурална или спинална анестезија, што ја блокира долната половина на телото. Поради лековите против болки, самиот процес воопшто не боли, иако може да почувствувате притисок или извлекувањето на бебето како своевидна сензација.
- ОПОРАВУВАЊЕ
Тешко е да се предвиди колку ќе трае опоравувањето, бидејќи секоја жена е поинаква. По вагиналното породување, жената обично останува во болница 24 до 48 часа. По породувањето се јавува крварење, отоци, грчеви. Мајките би требало да се одмораат барем неколку недели.
Доколку е во прашање царски рез, пропратните ефекти се малку почести. Може да се чувствува слабост во текот на првиот ден. Кашлање, кивање, смеење може да предизвикаат болка. Кога ќе помине првиот ден, жената е во состојба да се движи, што е многу важно за целиот организам. Во рок од неколку дена, жената се пушта дома. Можно е да и се препишат лекови против болка, а во наредните недели важно е да се одмора и заздравува.
- КОМПЛИКАЦИИ
За време на вагиналното породување често доаѓа до пукање на перинеумот, а некогаш се прави и епизиотомија. Ова бара подоцно шиење, а може да предизвикува болка. По породувањето, можни се и проблеми со контролирање на мочниот меур.
Во случај на царски рез, компликациите може да бидат потенцијални инфекции, хеморагија, крварење, повреди на мочниот меур или цревата за време на операцијата. Некогаш може да се случат и негативни реакции на анестезијата.
Иако ризиците за бебето во текот на царскиот рез се минимални, некогаш може да дојде до респираторни проблеми, особено ако се роди по 39. недела. За време на вагиналното породување, бебето се ослободува од таа течност од белите дробови.
