Почетокот на учебната година е стресен период и за децата и за родителите. Посебна трема ги фаќа оние најмладите што штотуку тргнаа во прво одделение во основно училиште, но и тинејџерите кои се запишаа во средно училиште и сега се соочуваат со сосема нови предмети, професори и сосема поинакви обврски од оние што ги совладале во претходните девет години.
Најважно е како родители за тоа да поразговарате со децата за тоа и да им објасните дека стресот и тремата се сосема нормални. Можеби веќе сте заборавиле дека и вие сте биле помалку исплашени на почетокот на учебната година? Многу е важно детето да сфати дека сте тука за него, дека го разбирате стресот со кој се соочува и дека се ќе решите заедно. Во никој случај не ја минимизирајте нивната нервоза или да им велите да не претеруваат, како и да ги прекорувате за тоа што го чувствуваат, бидејќи стресот е стрес и влијае на сите нас, без разлика колку години имаме.
За почетокот, но и остатокот од учебната година да помине во најдобро можно расположение, клучна е комуникацијата. Создадете безбедна атмосфера во домот, така што вашите ученици да знаат дека на крајот од секој ден ги чекаат лица на кои можат да им се пожалат или пофалат и со кои можат да разговараат за што било.
Воспоставување рутина
Една од најважните работи што можете да ги направите со децата е да воспоставите рутина. Земете планер и нивен распоред на часови во рака и запишете ги детално дневните задачи. Распоредот на часови е важен затоа што вашето дете ќе води сметка за она што се случува на училиште секој ден, а вие ќе можете со кус преглед да проверите кога имаат предмети како физичко образование кои бараат однапред да подготвите спортска опрема. Освен училишниот распоред, запишете ги обврските што следат после училиште. Запишување на времето во кое ќе се решаваат домашните задачи, учењето, одењето на воннаставни активности, но и играњето, ќе ви помогне да се организирате во текот на денот.
Договорете и рамковно време кое детето ќе го минува пред екран, кога ќе ви помага со некои мали домашни обврски, но и време предвидено за заедничко семејно дружење.
Доволната количина на сон е клучна за успешен развој на децата. Воспоставете приближно време за легнување во кревет и држете до тоа да секоја вечер, за детето полесно да заспива.
Пишување домашни задачи и учење
Најмладите деца допрва треба да усвојат работни навики кои вклучуваат редовно пишување домашни и учење. Оние постарите во основните училишта веќе го прифатиле она основното, но средното училиште носи дополнителни предизвици, па нема да не е на одмет да и со нив поразговарате за времето кое ќе се оддели на училишни задачи, по завршување на наставата.
Следете ги промените во однесувањето
Иако тинејџерите предничат во промените во однесувањето, тие се јавуваат кај деца од сите возрасти. Во ова се уште пандемиско време кога сите сме изложени на уште поголем стрес од вообичаеното, на сето ова се изложени и децата. Следете дали вашето дете до вчера било „разговорливо“, а денес одеднаш е многу тивко и повлечено.
Следете дали до вчера среќно се враќало од училиште, а денес на самото спомнување на училипте го фаќа нервоза. Отворениот разговор е нешто кон кое сите тежиме во секој однос, па така и она најважното – со децата. Најдоброто нешто што можете да направите е да му објасните на детето дека сте секогаш тука за него и дека може да ви пријде со целосна доверба во секоја ситуација, дури и ако на крајот се покаже дека е нешто банално. Слушајте ги бидејќи на возрасните може да им се чини дека децата се мали и безгрижни, но тоа не значи дека во моментов проблемите во нивните невини очи не им се најголемите во светот.
