Истражувањето на британскиот Кралски колеџ во Лондон покажа дека целосната вакцинација не само што го намалува ризикот од инфекција со коронавирус, туку и ја намалува можноста инфекцијата да се развие во т.н. долг Ковид, пренесува Би-Би-Си.
Истражувачите, исто така, откриле дека одредени групи луѓе се со поголема веројатност да бидат заразени по вакцинирањето – оние со послаб имунитет, постарите лица и луѓето што живеат во посиромашните области. Ова посебно се однесувало на оние кои примиле само една доза од вакцината
Резултатите покажуваат дека кај оние кои се вакцинирани и заразени со коронавирус, шансата нивните симптоми да траат подолго од четири недели е намалена за дури 50 проценти во споредба со оние кои не се вакцинирани.
Повеќето луѓе кои ќе се инфицираат со коронавирус целосно се опоравуваат во рок од четири недели, но некои симптоми траат со месеци по инфекцијата. Таканаречениот долг ковид, исто така, може да го доживеат и луѓе кои имале благи симптоми на почетокот на инфекцијата.
Истражени податоци за повеќе од 2 милиони луѓе
Научниците чиј труд е објавен во „The Lancet Infectious Diseases“ велат дека е јасно дека вакцините спасуваат животи и спречуваат сериозни болести, но дека досега се уште не било испитано како вакцината влијае на развојот на долг Ковид. Податоците за истражувањето се собрани преку британската апликација Zoe Covid Study, на која луѓето сами пријавуваат симптоми, вакцини и тестови.
Помеѓу декември 2020 година и јули 2021 година, повеќе од 1,2 милиони возрасни лица кои примиле една доза вакцина и 971.504 луѓе кои примиле две дози во тој временски период ги внеле своите податоци. Само 0,2 проценти, или 2.370 целосно вакцинирани лица, пријавиле дека се инфицирале со коронавирус по вакцинацијата. Од 592 целосно вакцинирани лица кои продолжиле да внесуваат податоци во апликацијата повеќе од еден месец, само 31, односно 5 проценти имале долг Ковид, што по дефиниција значи дека болеста трае 28 или повеќе дена по позитивниот тест.
Одредени групи се повеќе изложени на ризик да се заразат по вакцинацијата
Истражувачите, исто така, откриле дека одредени групи луѓе се со поголема веројатност да бидат заразени по вакцинирањето – оние со послаб имунитет, постарите лица и луѓето што живеат во посиромашните области. Ова посебно се однесувало на оние кои примиле само една доза од вакцината.
Главниот истражувач д-р Клер Стивс рече дека приоритет за добивање на трета доза треба да им се даде на овие најранливи групи.
