Почетокот на новата училишна година носи возбуда, но и стрес, како за децата, така и за родителите. Додека многумина се фокусираат на набавка на нови книги, тетратки и облека, наставниците истакнуваат дека за успешен почеток е клучно нешто сосема друго. Имено, усвојувањето добри навики од првиот ден поставува темели за целата година, а стручњаците открија што воспитувачите и наставниците навистина сакаат од семејствата, пишува Parents.com.
Компанијата ProCare Therapy, спровела истражување меѓу воспитувачи и помошен персонал за да дознае кои се најкорисните начини на кои семејствата можат да го поддржат успехот во училницата. Резултатите покажаа дека шест едноставни навики можат да доведат до подобри оценки и среќно дете.
Одмор и емоционална стабилност се приоритет
„Да се обезбеди детето да биде подготвено за училиште не значи да има најскапи материјали“, истакнува Сара Лејн Магана, стручњак за образование од ProCare со речиси десет години искуство. „Тоа значи да се осигура дека учениците доаѓаат во училиште добро одморени, нахранети и емоционално стабилизирани.“
Наставниците исто така ценат кога децата доаѓаат на настава со познавање на основните правила на однесување, како следење инструкции, слушање соговорникот и мирно прифаќање на промените во активностите.
Оставете ги децата сами да ја пишуваат домашната задача
Иако понекогаш на родителите им е полесно и побрзо да помогнат, наставниците советуваат спротивното. Тие секогаш можат да препознаат кога родителот премногу се вмешал во изработката на домашната задача. Кога родителите ќе го превземат тој дел, наставниците не можат да ги забележат слабостите и пропустите во знаењето на детето, а децата губат можност да градат самодоверба и самостојност.
Комуницирајте со наставниците уште од самиот почеток
Наставниците откриле дека родителите најчесто им се јавуваат дури кога ќе се појави некој проблем. Иако причините можат да бидат разни, од недостиг на време до страв дека ќе бидат наметливи, наставниците порачуваат дека никогаш не е прерано за воспоставување контакт.
Краток е-маил со поздрав на почетокот од годината гради доверба, но подеднакво е важно да не се чека со јавување доколку се појави проблем. Информации за стилот на учење на детето, емоционалните потреби или промени во семејниот живот, како преселба или болест, може да помогнат наставниците да обезбедат подобра поддршка.
Читајте секоја вечер, дури и со повозрасните деца
По напорен ден ова може да изгледа како дополнителен напор, но воспитувачите нагласуваат важноста на дневното читање. Без разлика дали родителите читаат на децата или децата читаат сами, оваа навика помага во градењето вокабулар, подобрување на разбирањето и развој на концентрацијата, без оглед на возраста. Наставниците тврдат дека само 15 минути читање навечер можат да направат огромна разлика до првите родителски состаноци.
Означете ги сите работи
Многу родители мислат дека означувањето на работите е резервирано само за градинка, но наставниците не се согласуваат. „Би биле изненадени колку идентични шишиња за вода, ранци и кутиии за ужина исчезнуваат секоја недела“, објаснува Магана. „Едноставна налепница со име штеди време, фрустрација и солзи.“
Нека детето биде самостојно
Не се работи за преземање на одговорности на возрасни, туку за давање одредена автономија во секојдневните рутини. Без разлика дали е врзување на чевли, подготовка на ужина или средување на папката со домашни задачи, децата кои можат самостојно да ги извршуваат задачите соодветни на нивната возраст ослободуваат драгоцено време во училницата и градат самодоверба.
„Првиот месец го поставува темпото за останатата дел од училишната година“, заклучува Магана. „Не очекуваме совршенство, туку само подготвеност за комуникација, конзистентност и ангажираност.“
