Дали некогаш сте почувствувале мачнина од мирис на кафе или одеднаш ви засметал бургерот кој претходно ви бил омилен? Не сте сама! До 80% од бремените жени имаат утрински мачнини, повраќање или одбивност кон одредени намирници или мириси – особено во првите недели од бременоста. Но, ново истражување на Универзитетот во Калифорнија (UCLA) покажува дека овие непријатни симптоми всушност може да се начин на кој телото ве штити – и тебе и бебето.
За многу жени, утринската мачнина знае да биде збунувачка, па дури и изолирачка. Но, научниците велат дека тоа е знак дека твојот имунолошки систем функционира совршено – „зад сцената“, внимателно внимавајќи на вас двајца.
Што велат научниците?
Професорката по антропологија Моли Фокс и нејзиниот тим следеле 58 бремени жени во Јужна Калифорнија. Земале примероци од крв и ги бележеле симптомите: мачнина, повраќање и чувствителност на одредени намирници или мириси.
Откриле дека жените со овие симптоми имаат засилен воспалителен одговор – што значи дека телото активно се обидува да се заштити, но и да го заштити плодот, така што имуниот систем нема да го препознае бебето како „туѓо“ и да реагира на него.
Еволутивен поглед на утринската мачнина
Интересно е што кај луѓето постои една од најинтензивните врски меѓу мајката и постелката. Тоа значи дека имунолошкиот систем мора да биде исклучително внимателен за да не го „отфрли“ бебето.
Научниците веруваат дека утринската мачнина е всушност „паметен“ заштитен механизам – начин на кој телото ги одбегнува можните штетни супстанции и храни, како тутун, силни сирења или недоволно термички обработено месо. На тој начин, телото го заштитува бебето токму во најраните, најкритични фази од неговиот развој.
Што значи ова за бремените жени?
Ако започнете да ја гледате утринската мачнина како сигнал дека вашето тело ве штити, можете да се ослободите од вина, стрес или чувство дека „нешто не е во ред“. Еве неколку корисни совети:
- Бидете нежна кон себе. Вашето тело моментално е суперјунак кој негува нов живот. Дозволете си да забавите кога ви е тешко.
- Побарајте поддршка на работа. Со оглед на тоа дека мачнината има биолошка основа, полесно ќе побарате флексибилно работно време, работа од дома или почести паузи.
- Разговарајте со својот лекар. Заедно можете да најдете безбедни начини за олеснување на симптомите.
Зошто е важно да го знаете ова?
Секоја минута мачнина е доказ дека вашето тело е отпорно, приспособливо и целосно посветено на создавање живот. Утринската мачнина можеби е тешка, но таа исто така покажува колку е паметна и прецизна човечката биологија.
Следниот пат кога некој мирис ќе ве извади од такт или ќе почувствувате мачнина во стомакот – сетете се дека вашето тело прави сè што може за доброто на вас и вашето бебе. Не е лесно, но е вредно – затоа што си дел од еден чудесен процес на создавање живот.
