Кинеските вакцини од денеска ќе бидат дистрибуирани во сите центри низ државава, со што планирано е помеѓу 10.000-15.000 дози да се аплицираат како прва доза во следните две до три недели со што значително ќе се забрза процесот на имунизација и ќе се извакцинираат сите граѓани пријавени преку веб-страната vakcinacija.mk
♦♦♦♦♦♦♦
Вчера во Скопје се одржа трибина на тема „Вакцинација и предизвици со Ковид-19“ на која учествуваа министерот за здравство д-р Венко Филипче, претседателката на Националниот комитетот за имунизација проф. д-р Александра Грозданова, проф. д-р Драган Даниловски, епидемиолог и проф. д-р Александар Петличковски од Институтот за имунобиологија и хумана генетика. На трибината се дискутираше за сите аспекти на вирусот Ковид-19 и за процесот на имунизација, а главната цел на овој настан, како што кажа министерот Филипче е да се зголеми свеста на граѓаните во врска со вакцинацијата.
Епидемиолошката состојба, делта вирусот (индиски сој), очекувањата, припремата и капацитетите, планот за имунизација и како истата ефективно да се спроведе во нашата земја, беа дел од темите на трибината.
„За да се прогласи крај на една епидемија треба два циклуси репродуктивни по 14 дена да нема дијагностицирано случаи и има некои предвидувања кај нас како тоа би можело да се случи, ако продолжат овие трендови. Тоа би се случило во месец август или можеби на почетокот на септември“, рече министерот д-р Венко Филипче.
Со оглед на тоа што има многу малку новодијагностицирани случаи на 100.000 жители, во моментов таа бројка е под 10, односно сегашната епидемиолошка состојба е стабилна. Болниците се празни, а само мал број на пациенти се лекуваат на Инфективната Клиника. Но системот е подготвен да одговори со болнички капацитети и со се што би било потребно во случај на нов, непредвиден епидемиолошки бран.
Соочувајќи се со нов бран всушност сој на делта вирусот верувам дека сите ќе станеме уште посвесни дека единствен начин да заврши оваа пандемија е што помасовна вакцинација, истакна претседателката на Националниот комитетот за имунизација проф. д-р Александра Грозданова
„Околу 15-20 јули стартува теренската вакцинација во околните места на здравствените домови. Во комуникација со матичните лекари, Здравствените домови ќе ја спроведуваат вакцинацијата преку регрутирање на податоци од тоа колку од прикрепените пациенти се вакцинирани се со цел да се опфатат и останатите. На некој начин, секој Здравствен дом ќе биде регионален центар“, објасни Филипче.
Според министерот, земјава е на добар пат да постигне што поголем опфат на вакцинирани граѓани. Заклучно со викендов околу 300.000 граѓани се вакцинирани во нашата држава, од кои 215.000 се ревакцинирани, а дадени се 500.000 дози на вакцини. Во моментов располагаме со доволен капацитет на вакцини, вклучувајќи ги новопристигнатите 500.000 дози на Синовак и 100.000 дози Фајзер. Веќе од денеска кинеските вакцини ќе бидат дистрибуирани во сите центри низ државава, со што планирано е помеѓу 10.000-15.000 дози да се аплицираат како прва доза во следните две до три недели со што значително ќе се забрза процесот на имунизација и ќе се извакцинираат сите граѓани пријавени преку веб-страната vakcinacija.mk, се вели во соопштението од Министерство за здравство.
Единствен начин да заврши оваа пандемија е што помасовна вакцинација
Крај на пандемијата не се вакцините туку самиот процес на вакцинација, вели претседателката на Националниот комитетот за имунизација проф. д-р Александра Грозданова.
„Соочувајќи се со нов бран всушност сој на делта вирусот верувам дека сите уште посвесни ќе станеме дека единствен начин да заврши оваа пандемија е што помасовна вакцинација. Ова е одличен период кога бројките на заболени се намалени и достапноста на вакцините е голема за да може населението да дојде и да се вакцинира. Така што еден јавен апел до сите без размислување најпрво да го пријават својот интерес затоа што тоа е наједноставниот начин да се добие терминот за вакцинација и потоа нормално да се вакцинираат“, рече Грозданова.
Околу 15-20 јули стартува теренската вакцинација во околните места на здравствените домови
Претседателката на Националниот комитетот за имунизација објасни дека кинеските вакцини „Синовак“ и „Синофарм“ претставуваат класични вакцини каде е инјектиран ослабен вирус односно технологија за добивање вакцини која се користи децении и е многу позната. Оттука вели Грозданова кај широката популација можеби се доживува како една од најбезбедните платформи во однос на новите вакцини како што беа РНА вакцините. Во однос на возраста на којашто се дава, Грозданова рече дека нема ограничување и дека во Кина се аплицира и кај деца над 3-годишна возраст, а во нашиот случај ќе се користи над 18 години и без ограничување на возраста кај возрасните лица. Вакцината се препорачува кај доилки и трудници за разлика од руската „Спутник“ којашто е јасно контраиндицирана за трудници и доилки, информираат од МЗ.
