♦♦♦♦♦♦♦
Американската Агенција за храна и лекови (ФДА) првпат одобри видеоигра да се издава на рецепт, како и останатите лекови. Така, лекарите имаат овластување да пропишуваат видеоигра за „iPhone“ и „iPad“ на деца на возраст од 8 до 12 години кои имаат синдром на нарушување на вниманието и хиперактивност (АДХД).
Играта ќе се користи заедно со други третмани, како што е клиничка терапија, лекови и едукативни програми.
АДХД е хронично невроразвојно нарушување кај децата, односно состојба на централниот нервен систем која главно се манифестира преку: недостиг на внимание, хиперактивност и импулсивност.
После седум години клинички испитувања низ кои минале 600 деца, видеоиграта доби статус на лек
После седум години клинички испитувања низ кои минале 600 деца, видеоиграта доби статус на лек. Резултатите од овие студии покажале дека една третина од децата веќе немале нарушување на вниманието, бидејќи играле EndakvorRX 25 минути на ден, пет дена во неделата, вкупно еден месец.
Од компанијата која стои зад играта истакнуваат дека единствени несакани ефекти од овој вид на терапија биле напнатост и главоболка, но многу помалку изразени во споредба со несаканите ефекти кои ги предизвикуваат традиционалните лекови.
Сепак, на крајот на студијата спроведена од лекари кои соработувале со креаторите на играта, се наведува дека „нема доволно докази дека AKL-T01 може да се користи како алтернатива на воспоставената и препорачана терапија со лекови за нарушување на вниманието и хиперактивност“.
До пред пет години, во САД се зборуваше дека оваа видеоигра може да е иднината во третманот на синдромот на нарушување на вниманието и хиперактивност и Алцхајмерова болест, а во 2017 година се појавија шпекулации дека видеоигрите ќе бидат терапија на иднината. Сега тоа стана реалност.
Еден од сличните примери на употреба на видеоигри во медицински цели е оној во кој лицата кои се здобиле со тешки изгореници со помош на виртуелна реалност ги олеснуваат болките.
