Летото е период на почести патувања, а тоа носи со себе ризик од ширење на некои вируси.
Јавниот здравствен систем на Велика Британија ги предупреди своите граѓани, особено родителите со деца кои патуваат во странство ова лето, да проверат дали се уредно вакцинирани со ММР вакцината бидејќи има зголемување на случаите на мали сипаници низ целиот свет, и на многу популарни летни дестинации.
Во соопштение објавено од Јавниот здравствен систем на социјалните мрежи, тие предупредуваат дека случаи на овој вирус „се регистрирани во многу земји, вклучувајќи ги и популарните летни дестинации“.
„Случаи на инфекција со мали сипаници се регистрирани во многу земји, вклучувајќи ги и популарните летни дестинации. Морбилите се вирусна инфекција која многу лесно се пренесува. Најдобриот начин да се заштитите себеси и вашето семејство од мали сипаници е да проверите дека сте вакцинирани со ММР вакцината пред да патувате во странство.“
Симптоми на мали сипаници
Како што е наведено од страна на Јавниот здравствен систем, првите симптоми на морбили се:
- Симптоми слични на настинка, како што се болки и малаксаност, течење на носот, кивање и кашлање
- Болни, црвени очи кои можат да бидат чувствителни на светлина
- Температура од 38 степени или повисока
- Појава на мали бело-сиви точки во устата
- Губење на апетитот
- Замор, раздразливост и општ недостаток на енергија
Симптомите обично почнуваат да се појавуваат околу 10 дена по инфекцијата, а осипот се појавува неколку дена подоцна.
Инаку, во последните години и во земјава се бележи поголем број на заболени од мали сипаници поради намалената стапка на вакцинација, поради што повремено се случуваат епидемии. Лекарите истакнуваат дека ова не треба да се случува во 21 век, кога имаме достапна вакцина против мали сипаници.
