Децата кои се изложени на ризик од целијачна болест (целијакија) имаат поголема веројатност да ја развијат оваа состојба ако консумираат натпросечни количини на глутен во текот на првите пет години од животот, укажува новата студија.
Целијакијата е генетско автоимуно нарушување на дигестивниот систем каде што протеинот глутен поттикнува воспаление во тенкото црево и влијае на способноста на телото да ги апсорбира хранливите материи од храната. Ова нарушување може да предизвика повеќе од 200 симптоми, од кои најчестите вклучуваат болки во стомакот и надуеност, дијареа и повраќање, запек, бледа столица, замор и губење на телесна тежина.
Глутенот, кој се добива од пченица, јачмен и ‘рж, се наоѓа во тестенините, житариците за појадок, повеќето видови леб, бисквитите, печивата и колачите.
Идните истражувања треба да дадат одговор дали елиминирањето на глутенот од исхраната го намалува ризикот од развој на целијачна болест, колку стриктно треба да се елиминира глутенот од исхраната и колку долго.
Извор: JAMA
