Министерството за здравство ја информира јавноста дека, согласно најновата прогноза од Управата за хидрометеоролошки работи (УХМР), во периодот од 20 до 24 јули 2025 година се очекува значително зголемување на дневните температури. Во одредени региони, температурите може да достигнат и до 41°C, што претставува сериозен ризик по здравјето на населението.
Ваквите екстремни температури можат да предизвикаат здравствени проблеми како топлотен удар, дехидратација и сериозни компликации кај најранливите категории на граѓани – деца, стари лица, бремени жени и лица со хронични заболувања.
Поради тоа, Министерството за здравство апелира до граѓаните да ги почитуваат општите препораки за заштита од високите температури.
ОПШТИ ПРЕПОРАКИ ЗА ЗАШТИТА ОД ВИСОКИ ТЕМПЕРАТУРИ
- Престојувајте во затворени, разладени простории, особено во периодот од 11:00 до 17:00 часот.
- Внесувајте доволно течности, избегнувајќи алкохол и засладени пијалаци.
- Носете лесна, светла облека и користете заштита за глава и очи.
- Избегнувајте физичка активност во најтоплите часови од денот.
- Посветете внимание на деца, стари лица, лица со хронични заболувања и бремени жени – овие групи се особено чувствителни на високи температури.
Екстремните температури можат да предизвикаат здравствени проблеми како топлотен удар, дехидратација и сериозни компликации кај најранливите категории на граѓани – деца, стари лица, бремени жени и лица со хронични заболувања
- Во случај на симптоми како вртоглавица, главоболка, гадење или забрзан пулс – веднаш побарајте медицинска помош.
- Одложете активности на отворено во најтоплиот дел од денот.
- Обезбедете микроклиматски услови (разладени простории со температура до 25°C) на работното место и во домот, советуваат од МЗ.
ДОПОЛНИТЕЛНИ СОВЕТИ ЗА ПРЕВЕНЦИЈА
- Јадете полесни оброци богати со свежо овошје и зеленчук.
- Често освежувајте го телото со млака вода.
- Никогаш не оставајте деца или миленици во паркиран автомобил, дури ни за кратко време.
* Топлотниот удар може да биде опасен по живот. Симптомите како висока телесна температура, конфузија, забрзано чукање на срцето или губење на свест бараат итна медицинска интервенција.
Топлотниот удар може да биде опасен по живот. Симптомите како висока телесна температура, конфузија, забрзано чукање на срцето или губење на свест бараат итна медицинска интервенција
СОВЕТИ ЗА ЗАШТИТА НА ДЕЦА
- Бебињата и малите деца треба почесто да се хидрираат – доење или давање вода на поголемите деца.
- Избегнувајте излегување со деца во периодот од 11:00 до 17:00 часот – тоа е најризично време.
- Облекувајте ги децата во лесна, широка, светла облека, со капче за заштита од сонце.
- Не користете пелени предолго, бидејќи може да предизвикаат топлотни осипи.
- Не оставајте деца без надзор во автомобил, количка или затворена просторија – дури ни за кратко време.
- Ако детето е премногу жедно, има забрзано дишење, е поспано или повраќа, веднаш побарајте лекарска помош.
Имајте на ум дека децата се најчувствителни на топлински стрес поради побрзиот метаболизам и помалата способност за регулирање на температурата.
