Различни категории на луѓе, имаат различни потреби за внес на течности. Трудниците и доилките претставуваат посебно чувствителна група сколна на дехидрација, и токму поради тоа, важно е да внесуваат доволна количина на течности. Улогата на течностите, а пред се на водата во организмот е повеќекратна. Водата има заштитна, градбена и транспортна улога и учествува во елиминација на токсините од организмот.
Доволната количина на вода во организмот ја подобрува функцијата на жлездите и на хормоните, го ослободува црниот дрод од вишокот маснотии и го намалува чувството на глад, допринесува за ефикасна работа на сите органи, а пред се, на зачувување на стабилноста на телесните течности.
Бременоста е силно и комплексно психолошко случување, но е сосема природна физиолошка состојба. Од зачнувањето до раѓањето на детето во телото на жената се случуваат низа промени. Меѓудругото, и водата е таа која ги прави можни овие промени. Таа помага организмот да се подготви за физиолошките промени кои се случуваат за време на бременоста и ги ублажува тегобите и несаканите ефекти.
Токму поради тоа, консумирањето вода во бременоста ги олеснува повеќето пропратни симптоми кај жената. Затоа е неопходно да се внесуваат повеќе течности во овој период.
Во првите месеци од бременоста може да дојде до поголемо исфрлање на течности како резултат на утринските мачнини, кои мора да се надоместат. Доколку патите од утрински мачнини, водата може да ви ги олесни тегобите, да ви помогне при проблеми со варењето и запекот, жиговина, да ги олесни главоболките, грчевите и вртоглавиците.
Истовремено, водата ја намалува и можноста за појава на уринарни инфекции кои се чести во текот на бременоста.
Бремената жена треба да внесува помеѓу 1,8 и 2,5 литри вода на ден. За оние активни трудници кои вежбаат се препорачува поголема количина на вода. Најдобро е внесот на течности да се распореди во текот на денот.
