Утврдено е дека децата кои посетувале градинка или дневен центар за грижа на деца имале помалку проблеми во однесувањето и биле подобри во односите со врсниците отколку децата кои останале дома со родител или старател
Дали ќе го запишете детето во градинка или ќе остане дома барем до училишна возраст е дилема со која се соочуваат многу родители.
Покрај тоа, многу мајки се чувствуваат засрамено и мислат дека другите ги осудуваат затоа што нивните деца се во градинка и мајките можат да се вратат на работа за да придонесат за семејниот буџет, како и за нивната кариера. Но, една студија заклучила дека престојот во градинка може да му помогне на вашето дете да се однесува подобро.
Во студијата насловена „Ран тип на грижа за децата“, истражувачите набљудувале 1.428 француски деца од моментот кога се родиле па се до нивниот 8-ми роденден. Истражувачите се одлучиле за Франција како фокус на нивното истражување бидејќи нивото на деца што одат во градинка во оваа земја е многу високо.
Студијата ги документирала емоционалните и бихејвиорални однесувања на децата и ги споредувала оние кои посетувале градинка или дневен центар за грижа на деца со оние кои биле во неформална средина, односно останувале дома со родител, член на семејството или дадилка, наведува „Moms.com“.
Пристапот до висококвалитетна грижа за децата во првите години од животот може да го подобри емоционалниот и когнитивниот развој на детето, да спречи подоцнежни емоционални потешкотии и да промовира просоцијално однесување
Децата кои посетувале градинка или дневен центар за грижа на деца, утврдено е дека имале помалку проблеми во однесувањето и биле подобри во односите со врсниците отколку децата кои останале дома со родител или старател. Така, потврдено е дека изложувањето на децата во средина во која секојдневно комуницираат со други деца, дефинитивно може да биде од корист. Тоа им овозможува на децата да научат како да споделуваат, да играат и да комуницираат со врсници, додека многу деца кои се дома можеби нема да бидат изложени на толку многу деца.
Студијата исто така открива дека девојчињата од семејства со повисоки примања имале најголема корист од престојот во градинка, „особено во поглед на односот со врсниците, емоциите и просоцијалното однесување“.
„Пристапот до висококвалитетна грижа за децата во првите години од животот може да го подобри емоционалниот и когнитивниот развој на детето, да спречи подоцнежни емоционални потешкотии и да промовира просоцијално однесување“, објасни д-р Марија Мелчиор, една од авторите на студијата.
