Министерството за здравство информира дека, според најновите податоци од Управата за хидрометеоролошки работи (УХМР), во периодот од 8 до 13 август 2025 година, се очекува значително зголемување на дневните температури, со максимални вредности кои во одредени региони може да достигнат и до 39°C. Во услови на екстремни горештини, се препорачува населението строго да ги почитува општите мерки за заштита, особено ризичните групи – децата, возрасните лица, бремените жени и лицата со хронични болести.
Децата, особено бебињата, се чувствителни на жештини бидејќи не се во состојба да ја регулираат телесната температура како возрасните
Општи препораки за заштита од високи температури
- Престојувајте во затворени, разладени простории, особено во периодот од 11:00 до 17:00 часот.
- Внесувајте доволно течности, првенствено вода, а избегнувајте алкохол и засладени пијалаци.
- Носете лесна, светла и широка облека, и користете заштита за глава и очи кога излегувате надвор.
- Избегнувајте интензивна физичка активност во најтоплите часови од денот.
- Посветете внимание на деца, стари лица, лица со хронични заболувања и бремени жени – овие групи се особено чувствителни на високи температури.
- Во случај на симптоми како вртоглавица, главоболка, гадење, замор или забрзан пулс, веднаш побарајте медицинска помош.
- Одложете непотребни активности на отворено, особено во попладневните часови.
- Овозможете разладени услови во домот и на работното место, со внатрешна температура до 25°C.
АМЕРИКАНСКА АКАДЕМИЈА ЗА ПЕДИЈАТРИЈА (ААП): Препораки за заштита на децата од топлина
‣ Кога е претопло за надворешни активности? ААП советува да се избегнува продолжен престој на отворено ако индексот на топлина надминува 32 °C. Децата, особено бебињата, се чувствителни на жештини бидејќи не се во состојба да ја регулираат телесната температура како возрасните.
‣ Хидратација и облека. Децата мора да бидат често хидрирани – за бебиња исклучиво млеко (мајчино или адаптирано), за деца – вода на мали, чести голтки.
‣ Облекувајте ги лесно – памучна, светла и лесна облека, што помага за природно ладење.
‣ Избегнувајте го најжешкиот дел од денот. Препорачливо е активностите надвор да се планираат во утринските или во вечерните часови, а не во пикот на жештината.
‣ Заштита од сонце. Не се препорачува користење на креми за сонце кај бебиња под 6 месеци – подобро е да се користи сенка, чадор, шеширче и очила за сонце.
‣ Симптоми на топлотни болести и кога да побарате помош. ААП го потенцира ризикот од топлотен удар и исцрпеност од жештина, и ги издвојува следниве симптоми: вртоглавица, летаргија, ненадеен замор, бледило, главоболка, гадење, треска, зголемена жед, конфузија. Во вакви случаи, веднаш побарајте медицинска помош!
‣ Опасност од оставени деца во возило. ААП, исто така, предупредува да не се оставаат деца без надзор во автомобил, дури ни на кратко – внатрешната температура може многу брзо да стане опасна!
‣ Пристап до разладени простории. Ако дома немате климатизација, користете разладени јавни центри како библиотеки или трговски центри.
