ПИШУВА:
Катерина Шекеровска-Димовска
katerina@pedijatar.mk
„Неонатологијата е гранка од медицината во која има постојано новитети кои овозможуваат континуирано и неуморно надградување на вештините и практиките, а благодарение на кои ние, неонатолозите, се трудиме да им дадеме шанса на критично болните новородени за подобар и поквалитетен живот“, вели ПРОФ. Д-Р СИЛВАНА НАУНОВА-ТИМОВСКА, ПРЕТСЕДАТЕЛ НА ЗДРУЖЕНИЕТО НА НЕОНАТОЛОЗИ, во пресрет на симпозиумот „Актуелности во неонатологијата“ со меѓународно учество, кој ќе се одржи од 15 до 17 ноември 2024 година, во хотелот „Хилтон“ во Скопје.
„Самата грижа за новороденото е тимска работа и бара мултидисциплинарен пристап, па затоа на овој симпозиум учество ќе земат лекари од повеќе специјалности: неонатолози, педијатри, гинеколози, детски хирурзи, ОРЛ специјалисти и доктори по семејна медицина. На симпозиумот ќе биде опфатена широка палета на актуелни проблеми и заболувања во неонатологијата и секако ќе има размена на искуства од кои најмногу бенефит ќе имаат бебињата кои се во најранливиот период од нивниот раст и развој“, додава проф. д-р Наунова-Тимовска.
Симпозиумот „Актуелности во неонатологијата“ со меѓународно учество организиран од страна на Здружението на неонатолози, кој ќе се одржи од 15 до 17 ноември 2024 година, во хотелот „Хилтон“ во Скопје, се очекува со нетрпение. Време е на летни одмори и пеколни горештини, но организацискиот и научниот одбор на симпозиумот работи со полна пареа. Во која фаза се подготовките?
Самата грижа за новороденото е тимска работа и бара мултидисциплинарен пристап, па затоа на овој симпозиум учество ќе земат лекари од повеќе специјалности: неонатолози, педијатри, гинеколози, детски хирурзи, ОРЛ специјалисти и доктори по семејна медицина
Проф. д-р Силвана Наунова-Тимовска: Без разлика што е период на годишни одмори организацијата на настан од ваков вид бара повеќемесечен активен ангажман. Бидејќи на овој симпозиум учество ќе земат реномирани домашни и странски предавачи, потребна е целосна посветеност и детално планирање на програмата со цел овој настан да биде успешен и да ги исполни како нашите, така и очекувањата на колегите кои ќе не почестат со нивното присуство.
Симпозиумот „Актуелности во неонатологијата“ претставува многу битен настан во областа на неонатологијата, каде што се дискутираат најновите достигнувања, истражувања и пракси поврзани со нега и третман на новороденчиња. Кои се главните теми, новитети и информации што ќе бидат опфатени во рамки на симпозиумот?
Проф. д-р Силвана Наунова-Тимовска: На овој симпозиум ќе ставиме повеќе акцент на одредени респираторни, кардиолошки и невролошки заболувања кај новородените деца, на инфекции, анемии и жолтици во неонаталниот период, на имунизација, хируршки состојби во новороденечката возраст и одредени перинатолошки проблематики кои се одразуваат на здравјето и благосостојбата како на бебето така и на мајката.
Грижата за најмалите обединува повеќе специјалности како што се неонатолози, педијатри, гинеколози… Кои медицински специјалности се поканети да учествуваат на симпозиумот?
Неонатологијата е гранка од медицината во која има постојано новитети кои овозможуваат континуирано и неуморно надградување на вештините и практиките, а благодарение на кои ние, неонатолозите, се трудиме да им дадеме шанса на критично болните новородени за подобар и поквалитетен живот
Проф. д-р Силвана Наунова-Тимовска: Самата грижа за новороденото е тимска работа и бара мултидисциплинарен пристап, па затоа на овој симпозиум учество ќе земат лекари од повеќе специјалности: неонатолози, педијатри, гинеколози, детски хирурзи, ОРЛ специјалисти и доктори по семејна медицина. Ќе биде опфатена широка палета на актуелни проблеми и заболувања во неонатологијата и секако ќе има размена на искуства од кои најмногу бенефит ќе имаат бебињата кои се во најранливиот период од нивниот раст и развој.
Ќе ставите посебен акцент на Светскиот ден на прематуритетот, 17-ти ноември. Како ќе биде одбележан денот на предвремено родените бебиња?
Проф. д-р Силвана Наунова-Тимовска: Последниот ден на симпозиумот е предвиден за обележување на Светскиот ден на прематуритетот со неколку предавања, а ќе бидат присутни и дел од малите борци чии приказни ќе служат како поттик за надградување на нашите знаења за да им бидеме верни сојузници во совладувањето на бројните предизвици со кои ќе се соочуваат во различни сфери од животот.
Не смееме да ги заборавиме и мајките чие здравје и благосостојба се клучни за понатамошниот раст и развој на плодот од неговата концепција па се до раѓањето. Поради тоа е неопходна едукација и поддршка на трудниците и одговарање на сите прашања кои би можеле да претставуваат проблем и причина за загриженост кај нив
Кои се најновите достигнувања во неонатологијата во последните години?
Проф. д-р Силвана Наунова-Тимовска: Неонатологијата е гранка од медицината во која има постојано новитети кои овозможуваат континуирано и неуморно надградување на вештините и практиките, а благодарение на кои ние, неонатолозите, се трудиме да им дадеме шанса на критично болните новородени за подобар и поквалитетен живот. Во тој контекст би посочила одредени достигнувања во спроведувањето на респираторната поддршка со посебен акцент на неинвазивната вентилација, потоа примена на индуцирана хипотермија како терапија на избор кај асфиктичните новоденчиња, пренатална дијагноза на вродените аномалии и нивно навремено хируршко решавање како и соодветна нутритивна поддршка.
Кои се најголемите предизвици со кои се соочуваат неонатолозите во нивната секојдневна работа?
Проф. д-р Силвана Наунова-Тимовска: Најголемиот предизвик е добивање на здраво и среќно дете кое ќе биде благодет како за семејството така и за општеството. Посебно во одделенијата за неонатална интензивна нега и терапија кои се високоспецијализирани единици за грижа на предвремено родени бебиња и критично болни доносени новороденчиња каде деноноќно се мониторираат нивните витални параметри со цел подобрување и стабилизирање на нивната здравствена состојба.
Што всушност претставува одржувањето на еден ваков симпозиум за неонатолозите, педијатрите и другите медицински професионалци кои работат со новороденчиња?
Проф. д-р Силвана Наунова-Тимовска: Симпозиумите се многу значајни за докторската фела бидејќи целта на нивната организација е размена на знаења, искуства и новитети со што би се зголемил и квалитетот на медицинската нега и грижа на нашите најмили.
Имате ли да додадете уште нешто на крајот?
Проф. д-р Силвана Наунова-Тимовска: Секако не смееме да ги заборавиме и мајките чие здравје и благосостојба се клучни за понатамошниот раст и развој на плодот од неговата концепција па се до раѓањето. Поради тоа е неопходна едукација и поддршка на трудниците и одговарање на сите прашања кои би можеле да претставуваат проблем и причина за загриженост кај нив.
