Јајцата се една од намирниците кои најчесто предизвикуваат алергиска реакција кај децата. Алергија на јајца обично се јавува неколку минути до неколку часа по јадење јајца или друга храна која содржи јајца (дури и во трагови).
Станува збор за една од најчестите алергии на храна во детството, која влијае на околу 9 % од децата од предучилишна возраст. Лесно може да се открие со помош на кожен тест за алергија или тест на крвта.
Алергијата на јајца може да се појави во раното детство (пред 5-годишна возраст). Повеќето деца ја губат алергијата на јајца пред пубертетот, но во некои случаи таа може да продолжи и во зрелоста
Алергија може да се појави и на белките и на жолчките од јајцата. Почеста е алергијата на белка од јајце. Ако вашето дете е алергично на белка или жолчка од јајце, најлесно е да ги избегнувате и обете.
Знаците и симптомите се движат од благи до тешки, а алергијата на јајца неретко може да предизвика и анафилакса (анафилактичен шок) – алергиска реакција опасна по живот. Се работи за претерана реакција на имунолошкиот систем на присуството на протеини од јајца. Имунолошкиот систем погрешно ги класифицира протеините како супстанции против кои е неопходно да се иницира одбранбена реакција која е толку бурна што, контрадикторно, му штети на самиот организам.
Кои се симптомите на алергија на јајца?
Реакциите може да се движат од лесни до тешки.
Лесни до умерени реакции се состојат од едно или повеќе од следниве:
- Осип;
- Отекување на усните, очите или лицето;
- Трнење во устата;
- Болки во стомакот или повраќање.
Тешките реакции (анафилакса) вклучуваат едно или повеќе од следниве:
- Отежнато/бучно дишење;
- Отекување на јазикот;
- Стегање во грлото;
- Потешкотии во разговорот;
- Зарипнат глас;
- Свирење или упорно кашлање;
- Постојана вртоглавица.
Ретко е (но можно) овие симптоми да се појават сами без осип и/или повраќање. Исклучително ретки се случаите кога луѓе починале од тешка алергиска реакција на јајце.
Дали детето ќе ја надмине алергијата на јајца?
Многу доенчиња и мали деца ќе ја надминат нивната алергија на јајца. Околу две третини ќе ја надминат својата алергија на возраст од 5-10 години.
Оние деца кои имале поблаги алергиски реакции само со кожни реакции имаат поголема веројатност да ја надминат нивната алергија отколку децата со потешки реакции. Вашиот лекар може да утврди дали алергијата на јајца и понатаму е присутна со следење на алергиски тестови секоја година.
Не постои лек или друга терапија што може да ја излечи алергијата на јајца или да спречи алергиска реакција. Единствен начин да се спречат симптомите е да се исфрлат јајцата и производите од јајца од исхраната, што може да биде тешко, бидејќи јајцата се честа состојка во многу јадења, а понекогаш може да се случи да не знаеме дали има јајца во некој оброк, поради што е потребно посебно внимание, и алармирање на надлежните служби во училиштето.
На некои видови храна може да стои предупредување на етикетата „може да содржи траги од јајца“. Ова обично значи дека храната е направена во објект во кој се произведува и друга храна која содржи јајца. Разговарајте со вашиот лекар што да направите во овој случај.
