Да бидеме искрени – во првите недели по породувањето, животот навистина може да биде тежок и хаотичен. Но, тоа е истовремено и магичен период. Мирисот на новороденчето не може да го замени ништо на светот, како ни среќата што сте мајка. И тогаш речиси и да нема жена која не помислува дека некои работи никогаш нема да се вратат во нормала, но верувајте, ќе се вратат.
- НЕСПИЕЊЕ
Физички е невозможно за било која мајка никогаш повеќе да не спие или да се носи со распоредот на новороденото бебе засекогаш. Фазата со новороденче е токму тоа – само фаза. Вашето дете ќе почне да спие во некој момент, а и вие ќе почнете да спиете во истиот. Ќе дојде време кога и вие и бебето ќе спиете цела ноќ и ќе се разбудите наспани и свежи. Запомнете, нема секогаш да биде вака!
- ПАТУВАЊА И ЗАБАВА
И мајките се луѓе. Да, извесно време сепак ќе мора да бидете дома и во близина на домот, но ќе дојде време (и побрзо од што мислите) кога повторно ќе имате време за себе. Ќе излегувате со пријатели, ќе одите на патувања и ќе имате различни авантури. Повторно ќе се чувствувате како некогаш.
- ТЕЛО
Вашето тело во моментов изгледа како вреќа полна компири, вашето лице е со подочници и не можете да замислите нормално седење на столица. Неверојатно е како телото се менува поради нашите бебиња , а уште поневеројатно е како се враќа во својата претходна состојба. Можеби нема телото да биде идентично како пред породувањето, но ќе биде слично. Само дајте си себе си време. Со првото бебе, навистина имате чувство дека секогаш сте во некоја стара и извалкана облека. Во еден момент, во блиска иднина ќе се средите, ќе се нашминкате и ќе изгледате совршено. Верувајте ни на зборот!
- ЛИЧЕН ПРОСТОР
Бебињата не го окупираат само домот, туку ги окупираат и нашите спални соби. Но, и ова е привремено. Бебето ќе се пресели во свој простор со тек на време. Ќе почне подолго да спие, и преку ден и навечер, а еден ден ќе почне да оди во градинка и на училиште.
