За време на цела бременост, телото се менува и се подготвува за породувањето. Способноста на телото да се трансформира во овој специфичен период е природен процес во кој се многу важни физичките активности. Заради тоа секогаш се добредојдени вежби за трудници кои идните мајки ќе ги направат задоволни и среќни, но и способни за извршување на сите вообичаени активности во текот на сите девет месеци.
ПРЕПОРАКИ
За вежбањето да биде сигурно и корисно потребно е да се познаваат и препораките на стручњаците, кои се следниве:
- Вежбајте редовно најмалку три пати во неделата
- Избегнувајте туркање, скокање и физичка активност со удари
- Вежбите се изведуваат на тепих или мека простирка која се става на тврда подлога поради ублажување на притисокот.
- Поради ослабеното сврзно ткиво во бременоста, не смее прекумерно да се истегнувате или свиткувате. Треба да се избегнуваат и нагли промени на насоката на движење.
- Пред напорни вежби телото треба да се загрее најмалку пет минути. Може брзо да одите, да возите статичен велосипед, или да танцувате, но со намален интензитет.
- Пијте течности пред и по вежбањето за да не дојде до дехидрација.
- Ако почувствувате необични симптоми, остра или необична болка или вртоглавица, веднаш престанете да вежбате.
ПРАВИЛА
- Бројот на отчукувања на срцето кај трудниците во една минута не смее да биде поголем од 140.
- По четвртиот месец од бременоста потребно е да се избегнуваат вежби во лежечка положба на грб.
- Облеката за вежбање треба да биде памучна и растеглива.
- Пред секое вежбање потребно е да се испразни мочниот меур.
- При секој гинеколошки преглед, побарајте дозвола за вежбање или продолжување на вежбањето од својот матичен гинеколог.
