До воспаление на слепо црево доаѓа кога тоа станува блокирано од нешто и се појавува инфекција. Слепото црево е мал орган кој е поврзан со дебелото црево и се наоѓа во долниот лев дел на стомакот.
Воспалението на слепо црево се смета за итен медицински случај, поради што е важно да знаете кои симптоми укажуваат на оваа состојба.
Причини за воспаление на слепо црево
Воспалението се јавува кога слепото црево е блокирано, што предизвикува развој на бактерии. До запушување на ова црево моќе да доведе:
- Тврда столица
- Отечени лимфни жлезди во цревата
- Паразити и други инфекции
Воспалението на слепо црево најчесто се јавува кај деца и млади на возраст од пет до 20 години, иако може да се појави и кај постарите лица. Оваа состојба не е заразна.
Симптоми кај деца
Најчесто, првиот знак на воспаление е благо покачена температура и болка во пределот околу папокот. Меѓутоа, оваа болка обично се влошува и се поместува на долната десна страна на стомакот.
Доколку детето се жали на болка во стомакот, обрнете внимание на следните симптоми кои би можеле да укажат дека станува збор за воспаление на слепото црево:
- Силна болка, особено околу папокот или во долниот десен дел на стомакот (болката може да биде минлива на почетокот, а потоа да расте и да стане многу интензивна)
- Благо покачена телесна температура
- Губење на апетит
- Гадење и повраќање
- Дијареа (особено кога станува збор за мали количини измет измешани со секрет)
- Отечен стомак
Понекогаш може да дојде и до пукање на слепото црево, што бара итна медицинска реакција. Температура која достигнува и 40 степени може да биде знак дека слепото црево пукнало.
Доколку се сомневате дека вашето дете има воспаление на слепо црево, веднаш отидете на лекар.
Компликации
Инфицирано, односно воспалено слепо црево кое не се лекува има поголеми шанси да пукне, што може да доведе до ширење на бактерии низ телото.
Не е лесно да се одреди дали се работи за воспаление бидејќи симптомите може да наликуваат на оние кои се јавуваат поради гастроентеритис, камења во бубрезите, пневмонија или инфекција на уринарниот тракт. Затоа е важно да не поставувате дијагноза сами, туку да го однесете вашето дете на лекар.
Лекување и операција
Понекогаш, во поблаги случаи, лекарите препишуваат антибиотици кои се даваат интравенски, а потоа се земаат уште седум дена. Меѓутоа, понекогаш тоа не е доволно или воспалението е премногу силно, а во овие случаи слепото црево хируршки се отстранува.
Оваа операција се смета за рутинска и закрепнувањето по неа обично не трае долго, неколку дена, а иако има шанси за некои компликации, тие се главно минимални.
Уште една работа која треба да се знае е дека воспалението на слепо црево на каков било начин не може да се спречи. Но, секако е добра вест што може без проблем да се лекува или оперира, доколку симптомите се препознаат навреме.
