Откако со месеци или години, спие со вас, било во неговото креветче покрај вашиот брачен кревет или со вас во вашиот кревет, преместувањето на детето во сопствена соба или креветче, воопшто не е лесна задача. За да ја направите постапката што е можно пократка и безболна, ви претставуваме неколку совети кои би можеле да ви помогнат.
Кога да започнете?
Во принцип, најдобро е да се започне транзицијата помеѓу 18 и 30 месечна возраст, но бидејќи секое дете е индивидуа за себе и се развива со свое темпо, прилагодувањето може да трае од неколку дена до неколку недели или дури месеци. Тоа зависи и од неколку фактори, од кои најважен може да биде вашата проценка дали е подготвено да спие во своја соба или не.
Секако, треба да се земе предвид дека ако се уште го храните детето навечер, поради таа ноќна зависност на детето од мајката, најдобро е да почекате некое време бидејќи тоа не е подготвено да спие во одвоена соба.
Работата ја отежнува и фактот што децата кои долго време спијат покрај своите родители или со родителите, нема да сакаат да се разделат од оваа привилегија, бидејќи спиењето со родителите го доживуваат како разгалување и безбедно негување.
На детето треба да му се објасни дека отсега ќе спие во сопствена соба и во сопствен кревет и важно е да се биде доследен. Тоа можете да го обзнаните преку церемонија и свечено прогласување: „Сега, кога веќе не си бебе, туку вистинско мало момче/девојче, одиш дури и во градинка, треба да имаш своја соба и да спиеш во свое креветче како сите вистински момчиња/девојчиња“.
Не попуштајте, ако можете
Со доследност и трпение, детето веќе за неколку ноќи ќе ги прифати новите правила за спиење и ќе знае дека е безбедно и ништо лошо нема да му се случи.
Ако детето заплакува секогаш кога излегувате од собата, обидете се да не попуштите. Со попуштање, сте ја изгубиле битката. Мора да му дадете до знаење дека со договорениот ритуал денот завршува, време е за спиење и дека нема да се враќате во неговата соба секој час. Ако стане/излезе од креветчето и дојде кај вас, потсетете го на договорот со смирен тон и пратете го назад во неговата соба со бакнеж.
