Училишниот период некому е најубав, а за некои најтежок, бидејќи токму тоа е периодот на барање, желба за припадност и создавање на односи. Злоставувањето или малтретирањето во училиштата се случува на различни нивоа, а понекогаш детето не е ни свесно дека некој се однесува недолично кон него. Семејниот терапевт Лори Сингер укажува на знаците кои можат да значат дека детето е малтретирано.
Загрижувачки знаци
Не е секогаш едноставно да се препознаат знаците на психичко или физичко малтретирање бидејќи тоа може да се манифестира преку различни однесувања, од повлекување до несоработливост и несоодветно однесување.
Детето може одеднаш да покаже отпор кон одење на училиште, може да одбива да појадува или да одбива да се подготвува за на училиште. Чести се и физичките симптоми како што се главоболки или болки во стомакот, кои се последици од емоционалниот стрес.
Не е невообичаено малтретираните деца одеднаш да почнат да покажуваат знаци на анксиозност, да се повлечат од семејството и пријателите, да станат потивки или понервозни, да имаат почести изливи на гнев, намалена желба за нешто што порано ги правело среќни и често попуштаат во училиште.
Најчестите физички показатели вклучуваат развој на некоја психосоматска болест, промени во исхраната и апетитот, модринки или исеченици на телото, потоа тешкотии со контролирање на мокрењето или празнење на цревата, нарушен сон и често губење на лични предмети или пари за ужина.
Одговорност на родителот е да го научи детето како да се однесува во ситуации кога некој го злоставува. Понекогаш децата не се ни свесни дека се работи за малтретирање, па затоа е важно да им се покаже кои однесувања се прифатливи, а на кои треба да се реагира.
Во повеќето случаи, на злоставувањето може брзо да се стави крај, доколку во целата приказна се вклучени родителите, наставниците и стручните служби. Во случај на долготрајно малтретирање и последиците што ги носи, важно е на детето да му се пружи стручна психолошка поддршка и да му се помогне повторно да најде радост во своето хоби и дружењето со пријателите.
Тешко е да се прифатие дека некој го малтретира вашето дете, а понекогаш е уште потешко да откриете дека вашето дете е насилник. Не треба да ја игнорирате таквата ситуација и треба да му помогнете на детето да развие здрави социјални вештини и да научи да ги почитува границите. Насилниците обично немаат социјални вештини за да им помогнат да се поврзат со другите деца.
