За да може детето да развие и да се стимулира развојот и стекнувањето нови вештини, не се потребни голем број на различни играчки. Тие не се најважни или клучни за развојот. Нешто друго е важно.
Развојот е индивидуален и она што му е потребно на едно дете може да не биде стимулативно или интересно за друго. Но, постојат клучни активности, прилагодени на детето, кои го поттикнуваат развојот. На бебето му требате вие, вашата љубов и поддршка, но и простор за движење. Преку движењето во просторот детето добива можност да го реализира својот потенцијал и да се развива сензомоторично.
Овие четири активности треба да ги вклучите во секојдневната рутина на вашето бебе.
- Лазење, качување, одење, преминување пречки
Кога ќе му дозволите на вашето дете да ползи на различни површини и да поминува време на подот, се активираат нервните импулси во пределот на дланката. Во првата година од животот на детето, развојот на раката игра клучна улога, а со заземање различни положби на телото, борејќи се против гравитацијата, ја подобрува неговата координација. На тој начин станува свесно за себе во однос на просторот и движењето, што е потребно за развој на моториката.
- Скокање, ротации, спуштање по тобоган, брзи движења
Дали ви пречи ако вашето дете скока на креветот? Оставете го да го направи тоа и уживајте со него. Додека детето скока на креветот и се врти во круг, мозокот ужива. Детето спонтано влегува во оваа активност, бидејќи мозокот на овој начин создава нови синапси.
- Движење без чевли
Кога детето оди босо и трча по различни површини, се активираат различни делови од мозокот. Овие разбудени делови од мозокот се неопходни за добра сензорна интеграција, што е од суштинско значење за учење. Кога детето соодветно одговара на барањата на околината, се вели дека е сензорно интегрирано.
- Џвакање храна
Децата не треба да се држат на кашеста храна долго време. За да може говорот да се развие правилно, мора да се зајакнат оралните мускули. Џвакањето храна е еден од начините за зајакнување на овие мускули. Се попопуларно е дохраната на децата со парчиња храна, особено овошје наместо каша.
И тоа не е без причина, бидејќи праксата покажала дека овој начин на хранење го поттикнува развојот на децата и им овозможува подобро да ги искусат вкусовите и да создаваат здрави навики во исхраната.
