Повеќето доени бебиња добиваат на тежина константно и рамномерно, но понекогаш тоа стагнира и разбирливо ја загрижува мајката и семејството. Зошто бебето не добива на тежина?
Доколку бебето редовно се дои, постои голема веројатност дека се ќе биде во ред и дека ќе ја следи кривата на раст, односно рамномерно ќе качува тежина. Меѓутоа, ако во одреден момент вагата ве поттикне да се запрашате зошто бебето не добива на тежина во одреден период, можеби причината ќе ја најдете во следните одговори.
Најпрво, имајте на ум дека адекватната исхрана е важна за вашето бебе и дека најдобар избор на храна во првите шест месеци од животот е мајчиното млеко. Дополнително, имајте предвид дека домашните ваги често не се најдобар показател за вистинската состојба. Доколку сте загрижени, задолжително посетете педијатар.
Можни причини зошто бебето можеби не добива на тежина
- Погрешен фат на дојката
Правилниот фат на дојката му овозможува на бебето да го исцица целото млеко од вашите гради без да се измори или вознемири. Ако вашето бебе не ја фаќа дојката како што треба или ја зафаќа само брадавицата, нема да може во потполност да го исцица целото млеко.
- Недоволно чести подои
Доеното новороденче мора да јаде најмалку на секои два часа во текот на денот и ноќта, во првите шест до осум недели. Ако сака и почесто, понудете му.
- Краткотрајно доење
Новороденчето мора да цица најмалку осум до 10 минути на секоја дојка. Но, како што ни ние возрасните не јадеме со иста брзина, така некои бебиња тоа ќе го направат за кратко време, а некои ќе уживаат полека. Како што расте бебето, така нема да му треба исто време да го исцица млекото од секоја дојка. Сепак, во текот на првите неколку недели, обидете се да го одржите детето будно и бидете сигурни дека активно цица.
- Болка или непријатност
Доколку забележите дека на бебето не му е удобно доењето, тоа може да се должи на некоја повреда која настанала за време на породувањето или пак може да има стомачни грчеви – колики. Поради ваквите проблеми може помалку да цица.
- Нема доволно млеко
Кај некои мајки млекото се појавува малку подоцна, а може да го има и помалку од она што му е потребно на бебето. Добрата работа е што тоа може релативно лесно да се реши. Во повеќето случаи доволно е да го ставате бебето на дојка почесто, за да се зголеми производството на млеко. Ретко може да се работи за медицински проблем, но и тоа е можно. Во тој случај треба да се јавите кај вашиот лекар.
Ризични групи
Кога ги знаете потенцијалните причини зошто вашето бебе не добива на тежина, можете да проверите дали вашето бебе е во ризичната група. Ова се следните ситуации:
- Предвремено родени бебиња – помалите или предвремено родените бебиња понекогаш немаат доволно сила ниту енергија да цицаат доволно долго за да го исцицаат целото млеко.
- Орални проблеми – може да му биде тешко на бебето да ја фати целата брадавица ако е тврда или преголема.
- Жолтица – жолтицата може да го направи бебето поспано и незаинтересирано за доење.
- Рефлукс – поради рефлукс, детето често го повраќа она што го изело. Покрај тоа, поради киселината може да му биде одбивно да цица.
- Невролошки проблеми – одредени невролошки проблеми може да му го отежнат доењето на бебето.
Привремена употреба на формула (доколку е потребно): Во случај на значително губење на тежина или недоволно добивање на тежина, педијатарот може да препорача привремено дополнување со адаптирано млеко додека се подобри доењето.
Дополнителни медицински фактори
Метаболички или генетски состојби: Во ретки случаи, овие состојби можат да влијаат врз добивањето на тежина.
Алергии или нетолеранции: Некои бебиња можат да имаат реакција на нешто во мајчиното млеко или формулата.
Знаци дека бебето добива доволно млеко
Број на мокри и валкани пелени: Ако бебето има 6-8 мокри пелени дневно и редовни столици, тоа е добар знак дека внесува доволно млеко.
Задоволство по подој: Ако бебето изгледа смирено и задоволно по подој, веројатно се нахранило соодветно.
Раст и развој: Покрај тежината, проверете дали бебето расте во должина и го зголемува обемот на главата.
Совети за подобрување на доењето
- Побарајте помош од консултант за доење: Тие можат да помогнат со техниката на фаќање на дојката и да утврдат дали има проблеми со доењето.
- Правилно позиционирање: Проверете дали бебето е поставено удобно и во правилна позиција за доење.
