Во извештајот, објавен денес, се наведува дека околу 287.000 жени ширум светот починале од овие причини во 2020 година, “што е еднакво на речиси 800 смртни случаи на мајки секој ден, а приближно една на секои две минути“.
Оваа бројка е подобрување од околу 446.000 смртни случаи на мајки пред 20 години, се вели во извештајот.
Стапката на смртност меѓу бремените жени или за време на породувањето опаднала помеѓу 2000 и 2015 година и оттогаш во суштина е во стагнација, а во некои региони дури е и зголемена.
Податоците во извештајот се однесуваат на 2020 година, а ефектите од пандемијата на коронавирус не се видливи во групата на податоци.
Состојбата во посиромашните региони и земјите погодени од конфликти е особено драматична, соопшти СЗО. Во Африка се забележани околу 70 проценти од глобалните смртни случаи на мајки во 2020 година, по што следат Централна и Јужна Азија, кои сочинуваа скоро 17 проценти.
“Ниту една мајка не треба да стравува за својот живот додека раѓа бебе, особено ако постои знаење и алатки за лекување на вообичаени компликации“, вели Кетрин Расел, извршен директор на УНИЦЕФ.
“Правичноста во здравствената заштита и дава на секоја мајка, без разлика која е и каде е, добра шанса за безбедно раѓање и здрава иднина со своето семејство. Причините кои може да доведат до смрт, а може да се спречат вклучуваат обилно крварење, висок крвен притисок, небезбедни абортуси или болести како ХИВ/СИДА и маларија. Речиси секоја смрт се случува во земјите со низок и среден приход и речиси секоја смрт може да се спречи“, вели шефот на СЗО, Тедрос Аданом Гебрејесус во предговорот на извештајот.
