Респираторните и цревни пролетни вируси “беснеат“ по градинките и училиштата, а заспиениот имунитет по две години епидемиолошки мерки, треба да се поддржи и зајакне за борба.
Добра вест е дека детскиот имунитет може да го зголемите со лесно достапни и квалитетни намирници, на кои со интересна подготовка и сервирање, децата нема да им оддолеат.
ЈОГУРТ
Јогуртот е вкусен и лесен начин детето да внесе добри бактерии во организмот. Тој е извор на квалитетни протеини кои помагаат во изградбата и обновувањето на телесните клетки, како и зајакнување на белите крвни зрнца кои ни помагаат да се бориме против инфекциите.
Дури и децата кои потешко го поднесуваат млекото, генерално полесно го варат јогуртот. Можете да го сервирате сам, замрзнат со овошје во форма на сладолед, или во него да додадете овошно пире.
Избегнувајте да користите шеќер и дополнителни засладувачи при сервирање на јогуртот на децата.
БАТАТ
Овој сладок зеленчук за многу деца е првата храна што ја вкусуваат на почетокот од дохраната. Децата генерално добро го прифаќаат поради слаткиот вкус и мека текстура и може да се сервира на неколку начини.
Испечете го на хартија за печење, во форма на стапче и послужете му го на детето со сос од јогурт и копар. Можете да го подготвите и печен во форма на кришки и да го послужите со свежи краставици или кисело млеко. Вкусен е и како пире со додаток на путер, а можете да го искористите за замена на компир во јадења со блитва и спанаќ.
Слаткиот компир е богат со бета каротен, антиоксидант што телото го претвора во витамин А, есенцијален витамин за здрава имунолошка функција.
АВОКАДО
Ова кремасто овошје е одличен извор на витамините Е и Б6, кои помагаат да се изгради имунитет и да се зголеми имунолошкиот одговор. Богат е и со омега 3 масни киселини кои му помагаат на телото да ги апсорбира квалитетните хранливи материи, а квалитетните масти се особено важни во исхраната на детето во развој.
Авокадото има неутрален вкус, па затоа е одлична основна храна за различни јадења, од намази до салати или десерти. Можете да му го понудите на вашето дете како намаз со маслиново масло, лук и лимон врз печени слатки компири или како пудинг со незасладено какао во прав и изгмечена банана.
