Чувството да станете мајка за прв пат е прекрасно, но и збунувачко искуство. Многу жени во бременоста и по неа учат многу за своето тело, а дел од промените што се случуваат се сметаат за табу теми.
Во минатото ретко се зборувало за некои телесни функции кои се менуваат за време на бременоста и по породувањето, а една од нив е и празнењето на цревата.
Запекот по породувањето е многу почест отколку што мислат луѓето. Студија спроведена во Финска во 2021 година покажала дека жените по породувањето имаат два до три пати поголеми шанси да се соочат со потешкотии во извршувањето на големата нужда во споредба со оние кои не родиле.
„Ги советувам мајките кои страдаат од тежок запек повеќе од неколку дена по породувањето, да побараат помош од бабица, патронажна сестра или лекар. Тие ќе им дадат насоки“, вели д-р Асанга
Запекот е почест кај жените кои се породиле со царски рез
Студијата покажала дека жените кои имале вагинално породување имале помала веројатност (47 проценти) да доживеат запек во деновите по породувањето во споредба со оние кои имале царски рез (57 проценти).
Докторката Нсисонг Асанга изјави за „Индипендент“ дека констипацијата може да се појави поради различни причини, вклучително и недоволно консумирање храна или пијалок во часовите пред породувањето.
„Тоа значи дека цревата се празни по породувањето и дека ќе им биде потребно повеќе време да се наполнат доволно за празнење“, истакна таа.
Исхраната сиромашна со влакна и недоволната хидратација исто така може да доведат до запек. Житарките од цели зрна и леб од цели зрна може да помогнат да ја збогатите вашата исхрана со влакна.
Лековите против болки и анестезијата исто така можат да влијаат на работата на цревата и да ја забават. Нивото на активност, исто така, игра улога во функцијата на цревата, а со оглед на тоа што новите мајки се одмораат и закрепнуваат деновите по породувањето, логично е варењето да биде забавено.
Побарајте медицинска помош
„Ги советувам мајките кои страдаат од тежок запек повеќе од неколку дена по породувањето, да побараат помош од бабица, патронажна сестра или лекар. Тие ќе им дадат насоки“, вели д-р Асанга.
Проблемот може да се ублажи и со лесни вежби, но за нивната изведба треба да се консултирате со вашиот лекар.
„Постојаното напрегање не е идеално и може да предизвика слабеење на дното на карлицата. Важно е да дишете и да одвоите време додека сте во тоалет. Ако имате запек повеќе од пет дена, треба да се обидете со лекови за омекнување на столицата, за кои може да се распрашате кај вашиот лекар“, порачува докторката.
