Нова видеосимулација покажува дека сегашните упатства за социјална дистанца можеби и не се доволни за да ги задржат џогерите безбедни за време на пандемијата на коронавирус.
Видеото, создадено од симулациската технолошка компанија „Енсис“, покажува дека респираторните капки се шират на повеќе од 2 метри растојание зад вас додека одите, трчате или возите велосипед.
- Поради ова, трчањето „рамо до рамо“ со некој, всушност може да биде побезбедно од трчањето позади него за директно да не дојдете во контакт со какви било капки, велат инжинерите.
„Ако видиме кит или делфин како исфрла вода, ние можеме да ја видиме водата и да скокнеме настрана ако мораме“, изјави Марк Хорнер, главен инженер за здравствена заштита во „Енсис“, за „Дејли мејл“.
Здравствените експерти велат дека зголемувањето на растојанието помеѓу вас и другите додека сте надвор е еден од клучните елементи за да се надмине пандемијата
„Но, ако некој кива или кашла, тоа се случува толку брзо и капките се толку мали“, вели Хорнер. Видеото покажува две сценарија: првото во кое двајца трчаат рамо до рамо и второто, кога трчаат еден позади друг.
Во првото сценарио, кога една личност кива или кашла, поголемиот дел од капките патуваат позади тој што трча, а не до него. Тоа е причината зошто сценариото кога едно лице џогира два метра позади другото – е небезбедно, објаснува Хорнер.
Симулациите одат во прилог на неодамнешните извештаи кои откриваат дека два метри дистанца можеби и не е доволно за да се заштитиме од новиот вирус.
(Извор: Дејли мејл)
