Кога стануваме родители, сите имаме иста желба: нашето дете да јаде здраво, да сака овошје и зеленчук и да има добар однос кон храната. И некаде на патот сите се прашуваме: „А што ако едноставно исфрлам слатк, грицки и сокови од дома?“
На прв поглед звучи логично. Но, според педијатрите, работите не се толку едноставни.
„Забранетото“ често станува најинтересно
Д-р Пери Клас, педијатар и професор по новинарство и педијатрија на Универзитетот во Њујорк, предупредува дека строгите забрани многу лесно можат да доведат до непосакувани последици.
„Забрането“ често станува најинтересно, објаснува д-р Клас. Слично мисли и педијатарката д-р Нимали Фернандо: „Кога на децата целосно ќе им забраниме одредена храна, таа станува особено привлечна, скоро како „забрането овошје“.“
Овој ефект, кој многу родители го препознаваат од сопственото искуство, е поврзан со поголем ризик од повисок БМИ кај децата, како и развој на нездрави модели на исхрана подоцна во животот.
Најраните години се клучни
Експертите се согласуваат дека родителите во најраната возраст имаат најголемо влијание врз навиките на детето за исхрана. Токму тогаш се создава околина во која на дофат на раката се разновидни, нутритивно богати намирници, и детето учи дека овошје, зеленчук и готвена храна се дел од секојдневието.
Тоа е време кога малите треба често да пробуваат нови вкусови, да ја поврзуваат храната со енергија и здравје и да учат дека одредени намирници се „основни“, а други „посебни“.
Подоцна, кога детето ќе тргне на училиште и ќе се сретне со слатки, сокови и грицки, можете да му објасните дека е во ред да ужива понекогаш, но не постојано.
Дозволете тортата, колачињата и сладоледот да бидат за посебни моменти, како родендени, излети или празници, но не како награда за оброк, добар успех или „ако изеде брокула“. Таквите „награди со храна“ често водат кон проблеми со саморегулација, прејадување и емотивно јадење.
Наместо тоа, претворете го заедничкото подготвување и уживање во храната во нешто топло и семејно: гответе заедно, јадете заедно, разговарајте. Така храната се поврзува со заедништво и убави спомени, а не со забрани и осуда.
Храната тогаш престанува да биде средство за контрола или преговарање и станува дел од секојдневното заедништво.
Различните семејни навики се прилика за учење
Децата многу брзо забележуваат дека во другите семејства се јаде различна храна, во различни количини и со различни правила. Наместо критика, експертите советуваат родителите да ја искористат оваа ситуација како прилика да ги објаснат своите семејни навики, но и да покажат почит кон туѓите избори.
Забрани имаат место само кога станува збор за вистинска опасност, како алергии на храна. Тогаш е важно родителите и детето јасно да знаат кои намирници треба целосно да се избегнуваат.
Најважното: Вие сте пример
Ако сакаш децата да јадат здрава храна, јади ја и ти. Ако сакаш да разберат разликата помеѓу секојдневна храна и „посебни прилики“, покажувај го тоа со својот пример.
