Целијакија е хронична болест која се карактеризира со интолеранција на глутен, составен дел од голем број намирници кои се користат во секојдневната исхрна. Тоа е хронично воспалителна болест на цревата, која често се јавува кај најмладите.
Кај ваквата дијагноза воведувањето на безглутенска исхрана е неопходна, но кај здравите деца не треба да се избегнува глутенот, за да не дојде до недостаток на останатите нутриенти важни за нормалниот раст и развој на децата, порачува Здружението на германските педијатри.
Храната без глутен често содржи повеќе маснотии, шеќери и соли, а помалку витамин Б, железо и фолна киселина, како и други важни нутриенти. Поради ова, исхраната на децата кои не патат од целијакија, базирана само на такви производи може да резултира со нуспојави, како дебелина.
Осум витамини од групата Б му овозможуваат на телото да добие енергија од храната која ја внесуваме во организмот, и да го поттикнат да произведува црвени крвни зрнца кои го разнесуваат кислородот низ телото. Фолната киселина е особено важна кај бремените жени, бидејќи спречува раѓање на децата со дефектни гени.
Влакната и житарките се важни бидејќи го контролираат нивото на шеќер во крвта, помагаат да се чувствувате сити после јадење и ја регулираат работата на цревата. Сите оние кои консумираат безглутенски производи без оправдани причини, притоа консумираат и помалку влакна важни за варењето на храната, предупредуваат германските педијатри и истакнуваат дека исфрлањето на глутенот од исхраната на децата кои немаат симптоми на целијакија, не мора да имаат позитивни влијанија.
Педијатрите потсетуваат дека глутенот е мешавина на два вида протеини – глутенин и проламин, и дека најчесто се наоѓаат во житарките како пченица, ‘рж и јачмен, но има многу храна за која не знаеме дека содржи глутен, како зачините за салати, крем супите, соја сосовите.
