Американка со ретка двојна матка се породила двапати за два дена по исклучително ретка бременост и вкупно 20 часа породување.
Келси Хачер (32) родила една ќерка во вторникот, а втора во средата, во болницата на Универзитетот Алабама во Бирмингем (УАБ), пренесува Хина.
Објавувајќи го доаѓањето на своите „чудесни бебиња“ на социјалните мрежи, родилката ги оценила лекарите како „неверојатни“. Девојчињата се опишани како двојајчани близнаци со ретки одвоени родендени.
Лекарите од УАБ потврдиле дека и мајката и бебињата се добро, објаснувајќи дека тоа е случај што повеќето луѓе во нивната професија „минуваат низ целата своја кариера и никогаш не го гледаат“.
На Келси Хачер и било кажано на 17-годишна возраст дека има двојна матка, што УАБ го опиша како ретка конгенитална аномалија која погодува 0,3 проценти од жените. Шансите за бременост и во двете матки – дикавитарна бременост – биле уште помали, „еден во милион“, според УАБ.
„Да се има двојна матка е реткост, а забременувањето и во двете во исто време е уште поретко“, велат лекарите.
Пријавените случаи во светот се исклучително ретки. Во 2019 година, лекар од Бангладеш изјави дека една жена родила близнаци речиси еден месец откако родила предвремено бебе во нејзината втора утроба.
