Постојат многу различни размислувања и верувања за доењето. Едно е сигурно – мајчиното млеко е здраво и полно со придобивки за детето. Всушност, се препорачува мајката да го дои бебето барем во првите шест месеци, а добро би било да продолжи до втората година од животот.
Но, често наидувате на разни митови за доењето кои можат само да предизвикаат конфузија во вашата глава и да создадат пречки за доењето. Затоа, ви донесуваме девет од најчестите заблуди кои можат да го расипат овој убав период од вашиот живот со вашето бебе.
- Мора да го доите бебето на секои три часа
Неточно. Бебето доите го на барање! Светската здравствена организација препорачува да се храни бебето секогаш кога е гладно и ќе побара млеко. Желудникот му е мал, а млекото лесно се вари, па многу брзо ќе огладне.
- Доењето е лесно бидејќи е природно
Неточно. Доењето може да биде тешко, но се учи. Се разбира, доењето е природен процес, но неопходно е да се научи како да се применува. Тоа може да биде тешко за некои мајки, особено ако се појават маститис и рагади или ако бебето не знае како правилно да ја фати брадавицата.
- Морате да почекате да се наполнат градите
Неточно. Како што цица бебето, вие создавате повеќе млеко. Тоа се создава кога детето ќе дојде во контакт со градите.
- Треба да пиете многу млеко за да имате доволно млеко
Неточно. Пред се, треба да воведете здрава исхрана и генерално да внесувате доволно течности во организмот, а не само млеко. За да имате доволно енергија и хранливи материи за производство на млеко, потребно е да внесувате околу 500 калории повеќе од вообичаено дневно. Јадете храна богата со протеини, зеленчук, овошје, морска храна, житарки.
- Престанете со доењето кога бебето ќе наполни 6 месеци
Неточно. Доете го вашето бебе онолку долго колку што сакате. Според експертите, мајчиното млеко е добро за детето и по втората година од животот.
- Мора да престанете со доењето ако повторно забремените
Неточно. Ако се е во ред со бременоста, доењето нема да влијае ниту на мајката, ниту на бебето во утробата. Кога ќе се роди второто дете, можете дури и да го доите заедно. Ова се нарекува доење во пар.
- Кога мама е исплашена или лута, не може да дои
Неточно. Млекото ќе продолжи да се произведува дури и по интензивни емоции. Кога телото е изложено на силни емоции, како страв или стрес, се лачат хормони за ‘преживување’ – адреналин, норадреналин и кортизол. Тие можат да го прекинат производството на млеко, но само во тој момент. Штом бебето ќе дојде до градите, лактацијата започнува повторно.
- Ако мајката е болна, не треба да дои
Неточно. Мајчиното млеко може да го заштити бебето од болести. Сепак, бидете повнимателни ако пиете лекови. Некои од нив не се безбедни за бебето.
- Жените со мали гради не можат да дојат
Неточно. Големината на градите не влијае на лактацијата. Големината на градите зависи од количината на масно ткиво. Доењето се должи на жлездите, кои немаат никаква врска со тоа.
