Моментот кога родителите ќе забележат дека кожата и очите на новороденчето имаат жолтеникава нијанса може лесно да предизвика паника, особено ако никогаш порано не го виделе тоа.
Станува збор за жолтица, а кај новороденчињата обично се појавува на вториот или третиот ден по раѓањето. „Тоа е чест проблем кој најчесто сам се повлекува“, објаснува педијатрискиот гастроентеролог, д-р Кадакал Радхакришнан, но понекогаш може да укажува на посериозен здравствен проблем.
Што е жолтица кај новороденчињата?
Жолтицата се јавува кога жолтеникав пигмент наречен билирубин се собира во крвта на бебето. Нашето тело го создава билирубинот кога го разградува вишокот на црвени крвни клетки и го испраќа во црниот дроб да се обработи.
Повеќето новороденчиња ќе развијат одреден степен на жолтица неколку дена по раѓањето, која обично се повлекува сама, без потреба од третман
„По раѓањето, кога бебето почнува да дише, вишокот на црвени крвни клетки кои ги имало во матката почнува да се распаѓа,“ објаснува д-р Радхакришнан. „Тоа го зголемува нивото на билирубин кај сите бебиња во првите неколку дена по раѓањето.“
Покрај тоа, црниот дроб кај новороденчињата не е секогаш доволно развиен за да го обработи билирубинот, што доведува до негово таложење и жолтеникава боја на лицето и белките на очите. Кај бебиња со потемна кожа, жолтеникавоста може да биде помалку видлива на кожата, но појасна во очите.
Кога жолтицата е поизразена?
Жолтицата може да биде посилна кај бебиња кои:
- Се родени предвреме.
- Имаат проблеми со доењето.
- Претрпеле модринки при породувањето.
Кога жолтицата е нормална?
Повеќето новороденчиња ќе развијат одреден степен на жолтица неколку дена по раѓањето, која обично се повлекува сама, без потреба од третман. На првиот преглед кај лекар (обично 3-5 дена по раѓањето), педијатарот ќе ја процени жолтицата и ќе одговори на сите ваши прашања.
„Нормално е родителите да се загрижени за жолтицата на почетокот,“ вели д-р Радхакришнан, „но во голем број случаи нема причина за загриженост.“
Кога жолтицата бара медицинска интервенција?
Жолтицата најчесто се подобрува сама и не бара третман, но ако трае подолго од една недела, треба да се провери повторно од лекар.
Контактирајте го педијатарот ако жолтицата кај вашето бебе:
- Не исчезнува во рок од една недела по раѓањето.
- Се зголемува и станува поизразена со текот на времето.
- Се шири на градите и/или стомакот.
Откако ќе се измери нивото на билирубин, лекарот ќе одлучи дали и како ќе се третира жолтицата. Најчесто се користи фототерапија — третман со сини светла кои му помагаат на црниот дроб да го обработи вишокот билирубин. Бебињата родени предвреме може да имаат потреба од поинтензивен третман односно подолго лекување.
„Често, покаченото ниво на билирубин не предизвикува сериозни здравствени проблеми,“ вели д-р Радхакришнан, „но многу високи или нетретирани нивоа може да предизвикаат оштетување на мозокот, а ризикот е поголем кај предвремено родените бебиња.“
Ако жолтицата се задржи, лекарот ќе размислува и за можни заболувања на црниот дроб кои влијаат на протокот на дигестивна течност (жолчка) кон цревата. Овие проблеми се ретки, но е важно да се јавите кај лекар ако жолтицата долго трае.
Често, покаченото ниво на билирубин не предизвикува сериозни здравствени проблеми, но многу високи или нетретирани нивоа може да предизвикаат оштетување на мозокот, а ризикот е поголем кај предвремено родените бебиња
Што ако бебето се роди со жолтица?
Ако вашето бебе има жолтеникава кожа и очи веднаш по раѓањето или жолтицата се појави многу брзо во првите 24 часа, тоа може да укажува на посериозен проблем отколку стандардната жолтица.
Причини за жолтица при раѓање може да бидат:
- Инфекција на крвта (сепса).
- Одредени вирусни инфекции.
- Нарушување на крвта кое предизвикува хемолитична анемија.
- Несоодветност во крвните групи помеѓу мајката и бебето.
Во овој случај, жолтицата ќе се проценува додека бебето е се уште во болница.
Добрата исхрана може да помогне жолтицата да се повлече. „Ова им помага на бебињата да имаат добра столица, што осигурува дека билирубинот се излачува преку цревата“, објаснува д-р Радакришнан. „Поради оваа причина, лекарот на вашето дете може понекогаш да препорача дополнително хранење со адаптирана формула покрај доењето, доколку е индицирано.“
Ако имате какви било грижи околу жолтицата, храната или здравјето на вашето новороденче, не двоумете се да се обратите кај вашиот педијатар.
