Малите деца се прекрасни, но исто така знаат и да бидат и супер напорни. И додека некои напорни форми на однесување се показател дека децата учат за себе и за светот, многу нешта се само јасен показател дека на детето му е потребен сон.
Мал “фластер“
Ако имате мало дете кое не сака да се “одлепи“ од вашите нозе или ве моли да го носите или гушнете – тоа често е јасен показател дека детето е уморно. Малите деца знаат кога не се свои, па се залепуваат до мама или тато за да се чувствуваат подобро. Ставете го вашиот мал “фластер“ на спиење што е можно поскоро за да не стане уште поуморно и поисфрустирано.
Барање внимание
Како што вашето дете станува исцрпено и уморно, ќе почне да бара се повеќе и повеќе внимание. Ваквата промена во однесувањето е знак дека детето треба да забави со активностите и да дремне или да легне да спие.
Пребирливост околу храната
Кога малите деца се уморни, ништо не изгледа добро, па храната не е исклучок. Ако детето почне да биде пребирливо за храната што вообичаено ја сака, ако одбива храна, ја фрла или неволно чепка низ чинијата – сфатете го тоа како знак на замор. Ненадејната пребирливост околу храната најчесто е знак дека децата треба да ги наполнат своите батерии, а со храната може да пробате подоцна, кога повторно ќе биде поактивно.
Раздразливост
Ако имате ситуација да што и да направите не му е по волја на детето или станало пречувствително и невозможно – големи се шансите дека е многу уморно и сака само да ги затвори очите и да заспие.
Зевање
Зевањето е веројатно наједноставниот знак дека детето е уморно, но и лесно е да се игнорира ако сте зафатени и имате многу обврски и задачи што треба да ги завршите. Кога вашето дете ќе почне да зева – префрлете се на планирање на дремка или спиење.
Досада и фрустрација
Ако на детето кое е инаку учтиво и љубопитно почнува се да сфаќа претешко и станува целосно незаинтересирано иако има авантуристички дух – разберете го ова како знак на замор и време за спиење.
Жалење и цимолење
Малите деца се жалат и цимолат од многу причини, а една од нив е и заморот. Ако вашето дете е несреќно и се околу него му претставува голем предизвик – погледнете дали се присутни и други знаци на замор и земете предвид дека веројатно е вистинското време за спиење.
Плачење
Малите деца не секогаш плачат затоа што или кога се уморни, но најчесто плачењето е јасен знак дека им е доста и дека треба да отспијат за да ги наполнат батериите. Прегратката и утехата се најдобриот одговор на тажното дете, заедно со нежно успивање.
