Видот веднаш по раѓање на бебето не е потполно развиен. Дури неколку месеци подоцна, видните дразби го започнуваат интензивниот развој на видот. Кога детето ќе наполни три години, родителите се тие кои се должни да го однесат своето дете на превентивен, односно рутински преглед на офталмолог, иако наизглед може да се чини дека се е во ред.
Родителите често знаат да кажат дека детето ги гледа дури и најситните трошки на тепихот, заборавајќи на фактот дека детето гледа со двете очи и затоа важно е да се испита видот на секое око поединечно. Исто така, само со преглед на видната острина не се одредуваат останатите аспекти на видот кои се исто толку важни за нормално, секојдневно функционирање на детето, особено во училиште. Тоа е на пример координација на очните движења, поставеноста на очното јаболко, можност за акомодација при гледање на близу, испитување на бинокуларен вид, присуство на страбизам и др.
Знаци на предупредување:
- Бела зеница
- Детето не фиксира, т.е. не забележува и со погледот не следи предмети и играчки
- Се криви едното или двете очи
- Го замижува едното око
- Наведнува глава кон рамо
- Прави спонтани, ритмички покрети на двете очи
- Претерано солзење
- Црвенило на очи
- Често триење на очите
- Замор
- Главоболка (особено при читање)
- Претерано доближување до ТВ.
