Главоболките се јавуваат релативно често кај децата и генерално не се причина за загриженост, туку се резултат на замор и дехидрација, но понекогаш може да укажуваат на нешто посериозно и да бидат многу интензивни. Кои се видовите и причините за главоболка кај децата, што може да помогне и кога треба да одите на лекар.
Видови главоболки
Мигрена – Овој посериозен тип на главоболка има специфични симптоми и се повторува. Освен болка, вообичаено е мигрената да предизвикува гадење, вртоглавица, чувствителност на светлина и звук, како и општо чувство на непријатност.
Тензиски главоболки – Во прашање е почест и поблаг тип на главоболка, каде што детето чувствува болка како нешто да го стега околу главата. Некои од најчестите причини се стрес, замор и слаба хидратација, односно недоволно внесување вода.
Главоболки поради инфекција – Не е невообичаено дете кое има инфекција како настинка или грип да се жали на главоболка, која обично престанува кога телото ќе се опорави од инфекцијата. Причината за оваа главоболка најчесто е запушување на синусите и инфекција што доведува до болка во пределот на очите и носот.
Главоболка предизвикана од прекумерна употреба на лекови – Лековите против главоболка не треба да се земаат подолго од две недели, а кај деца секако не и без консултација со лекар. Прекумерната употреба на овие лекови може да биде и причина за главоболки, така што тие почнуваат да се појавуваат почесто и да бидат поболни. Ако на вашето дете често му се потребни лекови против главоболка, најдобро е да се консултирате со лекар, пишува nationalwidechildrens.org.
Главоболки по повреда на главата – Не е реткост децата да се жалат на главоболка по повреда на главата, но таа обично не е премногу интензивна и исчезнува за околу две недели. Меѓутоа, во некои посериозни случаи, главоболката по повреда на главата може да трае неколку недели или месеци, за што треба да разговарате со лекар.
Главоболки предизвикани од дентални проблеми – Кога детето има болка или некаква непријатност во вилицата, болки во слепоочниците или слуша „кликнување“ при отворање на вилицата, треба да го однесете на стоматолог. Чкртањето со заби може исто така да биде една од причините за овој тип на главоболка.
Домашни решенија
Ако детето има блага главоболка која се јавува само понекогаш, најдобриот лек е одмор. Можете да користите и ладни или топли облоги, што повеќе му одговара на детето.
- Дајте му на детето некој од лековите или сирупи против болки, но внимавајте на дозата што е соодветна за возраста на детето.
- За да спречите прекумерна употреба на овие лекови и главоболки што може да настанат како последица на тоа, погрижете се да не му давате на вашето дете лекови против болки повеќе од два дена во неделата.
- Не давајте му на вашето дете аспирин или други лекови, освен ако тоа не ви го каже лекарот.
Водете евиденција за главоболките на вашето дете некое време, особено ако тие се чести. Информациите за тоа кога се појавуваат, колку долго траат, колку се интензивни, може да му помогнат на лекарот да ја утврди причината.
Кога е потребна итна помош
На дете со главоболка му е потребна итна помош ако има некој од следниве симптоми:
- Збунетост
- Екстремна поспаност (не можете да го разбудите)
- Ненадејна, силна болка во главата што се појавува за првпат
- Удвојување на видот – кога детето гледа две работи пред себе, а има само една
- Често повраќање во млаз
- Заедно со главоболката се јавува вкочанетост во вратот или болка во вратот, особено ако е придружена со треска
Кога треба да се обратите на лекар поради главоболка?
Иако главоболките обично не се причина за загриженост, консултирајте се со педијатар ако:
- Детето има главоболки секој ден, особено ако тоа веќе влијае на неговиот секојдневен живот
- Заедно со главоболката има и болка во окото или увото, конфузија, гадење или повраќање, чувствителност на светлина или звуци, вкочанетост.
- Главоболки одново се појавуваат и стануваат се посилни
- Тие се слични на оние што ги имаат некои членови на семејството
- Се појавуваат по повреда на главата и не поминуваат во рок од една недела
- Тие се доволно силни и го будат детето од сон
