Можеби сте забележале кај вашето или друго дете дека се однесува многу подобро кога е со татко му отколку со мајка му. Ова не е толку ретко, малечките обично го покажуваат своето “најлошо“ однесување токму пред мајка си, бидејќи покрај неа се чувствуваат побезбедно, па можат да бидат ранливи. Со тато, меѓутоа, подобро ги следат правилата и го прават тоа што ќе им се каже, а еве ги причините.
1. Мама поминува повеќе време со него
Можеби не е така во секое семејство, но главно мајките се тие кои поминуваат повеќе време со децата отколку татковците. Дури и мајките кои работат се некако посвесни за децата отколку татковците – повторно, во повеќето случаи, не значи дека е така секогаш и секаде – па тие главно ги подготвуваат децата за во градинка, училиште, ги хранат, си играат со нив…
Според некои податоци, мајките поминуваат во просек по шест часа на ден или повеќе со своето дете, додека работните татковци обично поминуваат помеѓу два и три часа дневно со своето малечко. Соодветно на тоа, оној кој поминува најмногу време со детето ќе присуствува на најголем број на емотивни испади на детето.
Покрај тоа, времето што родителите го поминуваат со своето дете, исто така, влијае на нивната емоционална состојба. Така, додека да дојде време детето да легне, мама обично е веќе уморна, исцрпена, што сето тоа влијае на комуникацијата со малечкото, но и на неговото однесување.
Таткото, пак, комуницира на поинаков начин и во пократок временски период, поради што е генерално посмирен и порасположен, поради што детето одржува позитивно однесување.
2. Имаат различни стилови на родителство
Децата се паметни, прилагодливи и се однесуваат во согласност со родителскиот стил и правила. Така, на пример, ако мама има авторитарен стил на воспитување, таа поставува јасни граници и правила, но смирено се справува со отпорот на најмалите. Од друга страна, тато го има истиот стил, но не толерира никаков отпор, ниту пак сака да преговара за правилата на однесување.
Во тој случај, детето брзо ќе сфати дека мама многу подобро се справува со жалење, негодување, па дури и расправии и дека поради таквото однесување кај тато ќе сноси последици.
Истото се случува и ако мама лесно попушта под притисок, а тато цврсто се држи до поставените граници. Во овој случај, детето повеќе ќе се жали и ќе негодува кај мајка си, за да се обиде да се „извлече“.
3. Тато е поопуштен
Кога возрасен човек се насмевнува, добро е расположен и опуштен и детето се однесува на сличен начин. Ако родителот е напнат, избегнува контакт со очи, зборува строго, грубо, луто, и детето ќе стане нервозно.
Ако вашето малечко се однесува подобро со тато, обрнете внимание на сигналите на вашето тело. Мајките генерално се малку понапнати и уморни, па децата го копираат нивното однесување.
4. Сигурна поврзаност
На децата им треба сигурна поврзаност со родителите, за мама и тато да бидат безбедно засолниште, односно родителот да биде мирен и присутен кога детето ќе доживее некои интензивни емоции.
Кога детето е луто, тоа почнува да се повлекува од своите родители, поради што е важно да реагирате на нивното лошо однесување со емпатија и сочувство, за да знае дека може безбедно да ги искаже своите емоции пред вас, дека ќе не го сакај помалку поради тоа.
Од детска перспектива, тоа е едноставно прашање – дали можам слободно да ги изразам моите чувства. И малите знаат кое е нивното безбедно пристаниште и пред кого слободно можат да се покажат во нивната „најлоша верзија“, која најчесто е мама. Затоа, ако вашето дете се однесува „најлошо“ кога е со вас, не се преиспитувајте дали правите нешто погрешно, туку знајте дека тоа е сигнал дека малечкото се чувствува најбезбедно со вас.
