Дали веќе сте се соочиле со “НЕ“ фазата на вашето дете? Зошто “НЕ“ фазата ги излудува родителите? На пример, тригодишниот Лука веќе никако не сака да носи маици со куси ракави, иако до вчера со нив немал проблем. Неговата мајка сигурно сака да знае зошто е тоа така. Но, Лука е премал за да може тоа да го објасни. Ќе реагира со влечење на маицата од себе ако мама се обидува да му ја облече и ќе вика “Не, не, не“.
И не е маицата единството што го мачи Лука и децата во светот. Има толку многу работи што вашето дете не ги сака, што понекогаш ви се чини дека цел ден само се расправате и натегате. И тоа е точно, бидејќи со едно истражување е утврдено дека двегодишните и тригодишните деца со родителите се “караат“ 20 до 25 пати во еден час.
Можеби ќе се исцрпите само гледајќи ги овие бројки, но сите овие пресметки имаат и позитивна страна. Овие ситни бунтувања се важни за стекнување самодоверба. Имено, за малите деца светот е големо и непознато место во кое тие се чувствуваат прилично беспомошно и се обидуваат на било кој начин да воспостават малку контрола. Ако често сте строги и не попуштате, детето може да почне да се чувствува беспомошно, преплашено, фрустрирано и луто. Сето тоа води кон уште поголем пркос.
Што тогаш можете да направите? Обидете се од вашето “Не-дете“ да создадете “Да-дете“ со некои родителски трикови, кои ви ги пренесуваме во продолжение.
- Фокусирајте се на позитивното
Децата не сакаат постојано да слушаат не, како и возрасните, па размислете колку пати во текот на денот, навистина нешто му забранувате. Наместо да му кажувате што да не прави, обидете се да му кажете што би сакале да прави. Исто така, обрнете внимание на тонот на гласот. Секако дека ќе викате од петни жили ако детето трча кон улица, но ако тоа не е таков настан, подобро е да му се обратите на детето со мирен, но решителен глас.
- Оправдајте ги вашите барања
Само не, тоа нема многу смисла за мало дете. Но, некое едноставно објаснување приспособено на возраста на детето може многу да направи. На пример, „Не можам да те носам затоа што имам бебе во стомакот и тоа може да го повреди“ ќе звучи подобро од „Не, нема да те носам“. Од друга страна, не нудете премногу детали и не давајте комплицирани објаснувања бидејќи тоа само ќе го збуни детето.
- Немојте секогаш вие да донесувате одлуки
Давањето избор од време на време ќе ја задоволи потребата на детето за контрола. Оставете го детето повремено самостојно да избере облека за градинка или што ќе појадува. Можеби нема секогаш да бидете најсреќни со изборот, но мудрата дипломатија ќе ви помогне да избегнете постојана драма.
- Весело расположение и соработка
Среди ги играчките! Не. Одиме на пливање? Не! Многу ваши прашања, барања и наредби ќе го добијат истиот одговор. Но, ако навистина сакате вашето дете да го прави тоа или е време за некоја активност (на пример, пливање), обидете се да направите игра од целата ситуација. Таквата ситуација и ќе ве опушти и ќе ве насмее и поверојатно е дека со таков пристап ќе го постигнете она што сте го сакале, без дополнителен отпор.
- Наградете го доброто однесување
Ако вашето дете има напад на бес во продавницата, може да му понудите колаче или чоколадо за да го смири барем додека не излезете надвор. Но, долгорочно, тоа всушност не е паметна тактика бидејќи излегува дека го наградувате лошото однесување. Бидете мудри и охрабрете добро однесување, со дополнително внимание, игра, голема прегратка, заедничка прошетка и други заеднички активности. Но, психолозите велат дека не смееме да ги заборавиме наградите. Сепак би било добро да ги ограничите на таков начин што наградите не се однесуваат на пари и храна. Значи, особено добро однесување наградете го со сликовница, цртан филм, боички и слични ситни знаци на внимание.
