Дали моето дете спие доволно? Дали ќе биде сè во ред ако не одспие доволно? Како ќе му се развива мозокот ако спие премалку? Како да воспоставиме рутина за легнување? Колку треба да трае рутината и што треба да вклучува? Како да го убедам детето да заспие ако не му се спие? Кога конечно моето дете ќе почне да спие?!
Кога стануваме родители, во центарот на нашето внимание е бебето – неговото здравје, неговата дигестија, развојот, неговиот сон. А токму тој сон нè мачи најмногу (можеби затоа што и нашиот сон зависи од него). Грижите поврзани со спиењето продолжуваат уште долго – со години. Најчесто се прашуваме дали нашето дете спие доволно, бидејќи битките за легнување се најбурни. И со право се грижиме, бидејќи сите велат дека доволно сон е клучен за детското физичко, а според понови истражувања и ментално здравје.
Но… време е малку да престанеме да се грижиме за тоа! Затоа што истражување покажало нешто поинакво.
Малку се шегуваме, знаејќи како многумина ќе реагираат, но факт е дека постои студија чиј резултат покажува дека еден аспект на детскиот сон може да е поважен отколку што сме мислеле – поважен дури и од самата количина на сон. А тоа е доследното време на легнување и рутината на спиење.
Студијата објавена во списанието Journal of Developmental and Behavioral Pediatrics ги набљудувала реакциите на 143 шестгодишни деца кои добиле стресна задача што требало да ја решат и групна активност што требало да ја завршат. Некои од децата имале доследна рутина на легнување, други не.
Она што го откриле било изненадувачко.
Седум ноќи пред тестирањето, децата носеле паметни часовници кои го мереле времето на спиење, будење, квалитетот на сон и вкупното време поминато во спиење. Децата со доследно време на легнување постигнале подобри резултати – во една задача се обидувале да отклучат кутија со играчки со клучеви кои не работат, а во другата заедно со родителите украсувале рамка за фотографии.
Децата кои секоја вечер одеа на спиење во приближно исто време биле помалку фрустрирани во првата задача и не покажувале антисоцијално однесување при групната активност. Интересно е што колку повеќе варирало времето на нивното легнување, толку полошо се снаоѓале – задачите им биле под поголем стрес.
„Децата кои редовно одеа во кревет генерално можеа подобро да ги регулираат своите емоции и однесување“, вели коавторката на студијата Адвоа Дадзи за Science Daily. „Од друга страна, децата со многу различно време на легнување покажуваа повеќе импулсивност и помалку контрола.“
На пример, децата кои легнувале речиси во исто време, со евентуално 20 минути разлика, имале значително подобра емоционална регулација од оние кај кои времето варирало дури и по два часа.
А најизненадувачки е што должината и квалитетот на спиењето не влијаеле значајно на нивното однесување за време на тестирањето. Ова особено ги изненадило научниците.
„Тоа е неверојатно“, вели коавторот Орфеу Бакстон. „Родителството е важно. Кога родителите воспоставуваат јасна структура и соодветно одговараат на потребите на детето, децата постигнуваат подобри резултати – дури и години подоцна.“
Ова не е првпат истражување да открие дека доследното време на спиење е поважно од други аспекти на хигиената на спиењето. Лани, студија на 60.000 луѓе во Велика Британија покажа дека редовното легнување има поголемо влијание врз здравјето од спиењето осум часа секоја ноќ. Тие со најуредна рутина биле со најнизок ризик од смртност од сите причини.
Значи, престани да се грижи колку време спијат навечер! Наместо тоа, фокусирајте се кога легнуваат – и тоа да биде секоја вечер во исто време. Лесно, нели? Барем додека не излезе некое ново истражување… Во секој случај – знаеме дека сонот е важен.
