Иако некои родители со гордост истакнуваат дека нивното бебе „ја прескокнало“ фазата на лазење и веднаш преминало на стоење или одење, Ешли, детска физиотерапевтка и мајка на две деца, предупредува дека тоа и не е баш причина за славење.
На својот ТикТок профил сподели порака што, како што вели, секој родител треба да ја чуе: „Лазењето носи толку многу придобивки за севкупниот развој на детето.“
Лазењето има влијание врз развојот на мозокот
Ешли објаснува дека лазењето има директно влијание врз развојот на мозокот бидејќи помага во комуникацијата меѓу левата и десната мозочна хемисфера. Тоа е основа за многу подоцнежни вештини, вклучително и говор, читање и разбирање.
Лазењето ги зајакнува мускулите на трупот, мускулите на рацете и на зглобовите, а сето тоа подоцна може да влијае врз детската вештина на пишување, хранење и самостојно облекување. Освен тоа, поврзано е со развојот на видот, просторната свесност и перцепцијата на длабочина – клучни елементи за безбедна и самоуверена ориентација во просторот.
Можеби ви се чини дека бебето е „напредно“ ако веќе стои и се обидува да оди, но Ешли појаснува: „Стоењето и одењето всушност се полесни од лазењето, затоа што многу деца во таа фаза ги вкочануваат зглобовите и ја користат напнатоста за да останат исправени. Тоа не е знак на вистинска сила.“
Лазењето има директно влијание врз развојот на мозокот бидејќи помага во комуникацијата меѓу левата и десната мозочна хемисфера. Тоа е основа за многу подоцнежни вештини, вклучително и говор, читање и разбирање
Дополнително, таа нагласува дека прераното поттикнување на стоење може негативно да влијае врз развојот на колковите.
„Како што внимаваме на положбата на колковите кога го носиме бебето во носилка, така треба да внимаваме и на положбата при стоење, а стоењето не е здраво за колковите пред приближно седмиот месец.“
Зошто некои бебиња не лазат?
Според детската окупациона терапевтка Фиона О’Фарел, бебињата треба да исполнат одредени предуслови за воопшто да можат да лазат:
- Доволно време поминато на стомаче (tummy time) – бебињата кои не поминувале доволно време во оваа положба често лазат подоцна или воопшто не лазат.
- Јачина на вратот, грбот и екстремитетите, како и координација на движењата.
- Самостојно седење и превртување, чекори што му претходат на лазењето.
Како да го поттикнете бебето на лазење?
- Соблечете го бебето до пелена, затоа што облеката како боди, панталончиња или хулахопки може да му ги ограничува движењата.
- Ставете го на стомаче, на безбедна површина и под надзор.
- Ставете ја омилената играчка малку подалеку од неговиот дофат – така ќе има мотивација да се обиде да стигне до неа.
Ако забележите дека детето сè уште не лази, дека се движи само на задникот или дека делува вкочането, добро е да се консултирате со детски физиотерапевт или окупационен терапевт кој ќе процени дали има потреба од дополнителна поддршка.
